ქართული ოცნების დეპუტატი, გუგული მაღრაძე ამბობს, რომ მომავალ წელს ფილანტროპიის კანონზე იმუშავებს, რომლის განხილვაც უკვე წლებია შეჩერებულია. ამის შესახებ დეპუტატმა გადაცემაში პირისპირ განაცხადა.

ის ამბობს, რომ საზოგადოებას ძალიან სჭირდება არამარტო ქველმოქმედება და გაჭირვებულის დახმარება, არამედ სჭირდება დახმარება იმისთვის, რომ განათლება, კულტურა, სპორტი ფეხზე დადგეს.

"მარტო სახელმწიფოს ბიუჯეტი არ უნდა იყოს ერთადერთი წყარო. ადამიანებს, ორგანიზაციებს უნდა შეეძლოთ უფრო თამამად გასწიონ ფილანტროპია", — განაცხადა მაღრაძემ.

საპარლამენტო უმრავლესობის წევრებმა ზვიად კვაჭანტირაძემ და გუგული მაღრაძემ პარლამენტს საკანონმდებლო ინიციატივის სახით საქართველოს კანონის პროექტებით ფილანტროპიის, ქველმოქმედებისა და საზოგადოებრივი პარტნიორობის შესახებ 2013 წელს მიმართეს. მას შემდეგ კანონმდებლებს ეს თემა არ განუხილიათ.