რუსეთის ფედერაციის ვიცე-პრემიერმა, ოლგა გოლოდეცმა, რეგიონების ხელმძღვანელებთან გამართულ შეხვედრაზე საქართველოს საზღვართან ახლოს რამდენიმე საკურორტო ზონის განვითარების გეგმებზე ისაუბრა.

გოლოდეცის თქმით, ყოველწლიურად მილიონი რუსი ტურისტი კვეთს საქართველოს საზღვარს ტურისტული მიზნებით, ეს კი რუსეთის ეკონომიკისთვის დაკარგული ფულია. გოლოდეცმა განაცხადა, რომ აუცილებელია, რუსი მოქალაქეების ტურისტული მოთხოვნილებები რუსეთის ტერიტორიაზევე დაკმაყოფილდეს. სწორედ, ამიტომ, საქართველოს საზღვართან ახლოს ორი დიდი საკურორტო ზონის განვითარება და კეთილმოწყობა დაგეგმა. Tass-ის ცნობით, გოლოდეცს ჯერჯერობით არ დაუკონკრეტებია, რომელ რეგიონებზეა საუბარი, მაგრამ, სავარაუდოდ, რუსეთის შავი ზღვისპირა რეგიონები იგულისხმა.

ამავე გამოცემის ცნობით, ბოლო წლების განმავლობაში, საერთაშორისო სანქციების ზრდასთან ერთად რუსეთში აქტუალური გახდა იმპორტის ჩანაცვლების თემა, მათ შორის ტურიზმის მიმართულებით. გოლოდეცმა უცხოური ტურიზმის ადგილობრივით ჩანაცვლების წარმატებულ მაგალითად ქალაქი უგლიჩი და ყირიმთან დამაკავშირებელი ხიდის პროექტი დაასახელა.