თელავში, ერეკლე მეფის სასახლეში, სადაც დღეს, 16 დეკემბერს პრეზიდენტის ინაუგურაციისთვის ემზადებიან, ცერემონიალის ბოლო დეტალებს აზუსტებენ.

ადგილი მედიისთვის ინაუგურაციის განმავლობაში დახურული იქნება. ტერიტორიაზე მედიის წარმომადგენლები მცირე ხნით შეუშვეს, სადაც ცარიელი ტრიბუნა და სტუმრების ფეხზე დასადგომი ადგილი დახვდათ.

ფეხზე დასადგომი ადგილი სტუმრებისთვის.

ფოტო: გვანცა ნემსაძე / On.ge

არჩეული პრეზიდენტის ტრიბუნასთან მზადება მიმდინარეობს.

ფოტო: გვანცა ნემსაძე / On.ge

სტუმრებისთვის განკუთვნილ ადგილზე, მხოლოდ რამდენიმე სკამი დგას.

ფოტო: გვანცა ნემსაძე / On.ge

ტერიტორიაზე წითელი ხალიჩაა დაგებული.

ფოტო: გვანცა ნემსაძე / On.ge

ფოტო: გვანცა ნემსაძე / On.ge

ახალარჩეული პრეზიდენტი სალომე ზურაბიშვილი დღეს ფიცს დადებს, რის შემდეგაც საპრეზიდენტო უფლებამოსილებების განხორციელებას შეუდგება.

კონსტიტუციის თანახმად, თანამდებობის დაკავების წინ საქართველოს ახალარჩეული პრეზიდენტი საპროგრამო სიტყვას წარმოთქვამს და დებს ფიცს. ახალარჩეული პრეზიდენტის მიერ ფიცის დადებისთანავე უფლებამოსილება შეუწყდება გიორგი მარგველაშვილს.0

სალომე ზურაბიშვილის ინაუგურაცია თელავში, ერეკლე მეორის სასახლეში, 15 საათზე დაიწყება და 40 წუთს გაგრძელდება. მოსახლეობას საშუალება ექნება ინაუგურაციას თვალი ვაჟა- ფშაველას სახელობის თეატრის წინ დამონტაჟებულ მონიტორზე ადევნოს.

დღესვე სალომე ზურაბიშვილი მოწვეულ სტუმრებთან ერთად, 16 საათზე, ვაჟა-ფშაველას სახელობის დრამატულ თეატრში საზეიმო მიღებას გამართავს.

საქართველოს მე-5 პრეზიდენტის ინაუგურაციის ცერემონიალში მონაწილეობას მიიღებს მსოფლიოს 55-მდე ქვეყნის 150-მდე წარმომადგენელი. საქართველოს ეწვივნენ მაღალი რანგის სტუმრები 20-ზე მეტი ქვეყნიდან, ასევე 16 საერთაშორისო ორგანიზაციის წარმომადგენელი.

პარალელურად, გაერთიანებული ოპოზიციის აქციაა დაგეგმილი თელავში. გუბერნატორის თქმით, მათთვის თელავის ერთ-ერთი ცენტრალური მოედანია გამოყოფილი. ოპოზიცია არჩეული პრეზიდენტის ლეგიტიმაციას ეჭვქვეშ აყენებენ და ითხოვენ ვადამდელ საპარლამენტო არჩევნების ჩატარებას. მიუხედავად იმისა, რომ ინაუგურაციის მიმდებარე ტერიტორიას პოლიცია იცავს, ოპოზიციას აქციის გამართვა მაინც ერეკლე მეფის ძეგლთან უნდა.