პრეზიდენტის საპარლამენტო მდივნის, ანა ნაცვლიშვილის განცხადებით, გათავისუფლების თხოვნით მან პრეზიდენტის დღეს, 14 დეკემბერს მიმართა. თავის ფეისბუქზე ნაცვლიშვილი აღნიშნავს, რომ საპარლამენტო მდივანს ავტომატურად არ უწყდება უფლებამოსილება, მაგრამ მიაჩნია, რომ საპარლამენტო მდივანი ისევე, როგორც ადმინისტრაციის უფროსი და მრჩევლები, პრეზიდენტმა თავად უნდა შეარჩიოს.

"ეს დღეც დადგა. დღეს, ვასრულებ მუშაობას საქართველოს პრეზიდენტის საპარლამენტო მდივნის რანგში", — წერს ნაცვლიშვილი.

ანა ნაცვლიშვილი საპარლამენტო მდივნად 2018 წლის 9 იანვარს დაინიშნა. მანამდე ის იყო სახელმწიფო საკონსტიტუციო კომისიის წევრი. 2016-17 წლებში იყო სტრასბურგის ადამიანის უფლებათა სასამართლოში წარსადგენი მოსამართლეობის კანდიდატების შესარჩევი კომისიის წევრი.

2014 წლიდან მუშაობდა საქართველოს ახალგაზრდა იურისტთა ასოციაციაში, 2014-2017 წლებში სამჯერ იქნა არჩეული ამავე ორგანიზაციის თავმჯდომარედ. ამავე პერიოდში ხელმძღვანელობდა ოცდაათზე მეტი არასამთავრობო ორგანიზაციისაგან შემდგარ კოალიციას დამოუკიდებელი და გამჭვირვალე მართლმსაჯულებისათვის.

გათავისუფლების მოთხოვნით პრეზიდენტს დღეს მისი ადმინისტრაციის უფროსმა, გიორგი აბაშიშვილმაც მიმართა:

"ბატონო პრეზიდენტო, მე თქვენთან დავიწყე მუშაობა და თქვენთანვე დავამთავრებ! ამიტომ დღეს ჩემი განცხადება დაგხვდებათ — "ბატონო პრეზიდენტო, გთხოვთ გამათავისუფლოთ დაკავებული თანამდებობიდან მიმდინარე წლის 16 დეკემბრიდან".