სადაზღვევო კომპანია აისი ჯგუფი Euroins Group-ის წევრი გახდა. შერწყმის პროცესის პირველი ეტაპის დასასრულებლად, 2018 წლის 11 დეკემბერს, საქართველოს Euroins Insurance Group-ის აღმასრულებელი დირექტორის მოადგილე გეორგი მარკოვი და დირექტორთა საბჭოს წევრი და სტრატეგიული განვითარების დირექტორი ჩაატაი ულუდაგი ეწვივნენ.

აი სი ჯგუფი, ამიერიდან, ევროინს საქართველოს სახელით იმუშავებს ქართულ ბაზარზე და ევროპული სადაზღვევო კომპანიის პრაქტიკას, საერთაშორისო გამოცდილებას და ევროპაში უკვე აპრობირებულ, თანამედროვე დაზღვევის სისტემას დანერგავს, რომელიც ადგილობრივ სამომხმარებლო ბაზარზე იქნება მორგებული.

ქართული სადაზღვევო კომპანიის შერწყმა Euroins Group-ის განვითარების სტრატეგიის ნაწილია. კომპანიის წარმომადგენლები საქართველოში შემოსვლის გადაწყვეტილების მთავარ მიზეზად კი ჯანსაღ ბიზნეს გარემოს, ეკონომიკურ ზრდას და სადაზღვევო სექტორის დინამიურად განვითარების პროგნოზს ასახელებენ.

აღსანიშნავია, საქართველოში გამართული საკანონმდებლო ბაზის არსებობა და ზედამხედველობის სამსახურის როლი, რომელმაც ოპერატიულად გასცა ნებართვა და მნიშვნელოვანი როლი ითამაშა გარიგების წარმატებით დასრულებაში.

"საქართველო მდიდარი ტრადიციებისა და მემკვიდრეობის ქვეყანაა, სტრატეგიულად მნიშვნელოვან გზაჯვარედინზე, როგორც რეგიონალურად, ისე გლობალურად. 'აი სი ჯგუფის' სახით ვიპოვეთ სანდო პარტნიორი, რომლის პროფესიონალთა გუნდს მრავალწლიანი გამოცდილება აქვს, ასევე მზადყოფნა ცვლილებისათვის და რაც მთავარია, უნარი განახორციელოს ჩვენი საერთაშორისო კონკურენტუნარიანი გეგმები მთელს რეგიონში. ჩვენი მიზანია, რომ მაღალი ხარისხის მომსახურების, მომხმარებელთა კმაყოფილების და მაღალი ნდობის მოპოვების ფონზე, საქართველოში დაზღვევა და სადაზღვევო პროდუქტები განვავითაროთ", - განაცხადა გეორგი მარკოვმა.

გარდა უცხოური ინვესტიციის მოზიდვისა, EIG საქართველოში დასავლური გამოცდილების და ცოდნის იმპორტსაც განახორციელებს. დაგეგმილია კომპანიის თანაშრომლების როტაცია ევროპის სხვადასხვა ქვეყნებში ევროინს ჯგუფში შემავალ სადაზღვევო კომპანიებში და ტრეინინგ ცენტრებში, ასევე, იგეგმება უცხოელი სპეციალისტების ჩამოყვანა, რაც კომპანიას ცოდნის და გამოცდილების გაზიარების საშუალებას მისცემს ევროინს სადაზღვევო ჯგუფის შესახებ.

ევროინს ჯგუფი ერთ-ერთ უმსხვილეს სადაზღვევო კომპანიას წარმოადგენს, რომელიც ოპერირებს ცენტრალურ და სამხრეთ-აღმოსავლეთ ევროპის ბაზარზე. კომპანია ორიენტირებულია სადაზღვევო პროდუქტების სრულ სპექტრზე. ბულგარეთში დაფუძნებული სადაზღვევო კომპანია ოპერირებს ევროპის 8 ქვეყანაში და აქედან ოთხში შვილობილ კომპანიებსაც ფლობს: ბულგარეთში, რუმინეთში, მაკედონიასა და უკრაინაში.

2014 წლიდან ევროინს ჯგუფმა ფუნქციონირება დაიწყო საბერძნეთში. კომპანიაში 1600 ადამიანია დასაქმებული, ხოლო მომხმარებელთა რაოდენობა 2.5 მილიონზე მეტს შეადგენს. კომპანიის წლიური ბრუნვა ნახევარი მილიარდი ევროა.

ევროინს ჯგუფი ევროჰოლდ ბულგარეთის შვილობილი კომპანიაა, რომლის აქციებიც განთავსებულია BSE-Sofia-ისა და WSE-ის საფონდო ბირჟაზე. ევროჰოლდ ბულგარეთი არასაბანკო ფინანსური მომსახურებისა და აქტივების მართვაზეა ორიენტირებული.

აი სი ჯგუფი 2005 წლის 10 ნოემბერს დაარსდა და მას შემდეგ მომხმარებელს სადაზღვეევო მომსახურების სრულ სპექტრს სთავაზობს. კომპანია აქტიურადაა ჩართული დაზღვევის სფეროს საკანონმდებლო რეგულაციების შემუშავებაში, როგორც სავაჭრო და სამრეწველო პალატის, საქართველოს ბიზნეს ასოციაციისა და საქართელოს სადაზღვევო ასოციაციის წევრი. ამჟამად კომპანიაში 100-ზე მეტი მაღალი კვალიფიკაციის მქონე თანამშრომელია დასაქმებული, ზოგიერთ მათგანს კი დაზღვევის სფეროში მუშაობის 20 წელზე მეტი გამოცდილება აქვს.