ცენტრ ემპათიას ხელმძღვანელის, მარიამ ჯაშკარიანის ინფორმაციით, სტრასბურგის ადამიანის უფლებათა ევროპულმა სასამართლომ განსახილველად მიიღო არჩილ ტატუნაშვილის საქმე რუსეთის წინააღმდეგ. ამის შესახებ ჯიშკარიანმა On.ge-ს განუცხადა.

ყოფილი სამხედროს, ცხინვალში წამებით მოკლული არჩილ ტატუნაშვილის ინტერესების დასაცავად ევროსასამართლოს ცენტრმა ემპათიამ მიმართა. ორგანიზაციის ინფორმაციით, ახლა ყველა ის მტკიცებულებაა წარდგენილი, რომლითაც ტატუნაშვილის წამება დასტურდება.

არჩილ ტატუნაშვილის საქმე

სამხარაულის ექსპერტიზის ბიუროს კომისიური დასკვნით, არჩილ ტატუნაშვილის სხეულზე არსებული დაზიანებები ერთობლიობაში უნდა შეფასდეს, როგორც სიცოცხლისთვის სახიფათო მძიმე ხარისხის, რასაც შედეგად მოჰყვა სიკვდილი.

მას შემდეგ, რაც არჩილ ტატუნაშვილის ცხედრის სამედიცინო ექსპერტიზის შუალედური შედეგები გახდა ცნობილი, შინაგან საქმეთა სამინისტრომ საქმეს წამების კვალიფიკაცია დაუმძიმა.

არჩილ ტატუნაშვილის ცხედარი ოკუპირებული ტერიტორიიდან გარდაცვალებიდან 26 დღეში, 20 მარტს გადმოასვენეს. ტატუნაშვილი 22 თებერვალს ცხინვალის ციხეში გაურკვეველ ვითარებაში გარდაიცვალა. ოსური მხარის ვერსიით, მან იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებდა, რომ ტატუნაშვილი ინფარქტით დაიღუპა. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ მაშინ პოზიცია შეცვალა.