ქართული ოცნების დეპუტატი, ლევან გოგიჩაიშვილი აცხადებს, რომ გიორგი მარგველაშვილის ინიციატივა ოპოზიციასთან მოლაპარაკებების დაწყების შესახებ "დემოკრატიობანას თამაშია". გოგიჩაიშვილს მიაჩნია, რომ გაერთიანებულ ოპოზიციის ქმედებები არასწორი პროცესია და ამ განცხადებით მარგველაშვილმა მათ მხარი დაუჭირა.

"საფუძველი არ აქვს. მე ვერ გავიგე ამ ადამიანს ზოგადად რა უნდა. ეს არის მისი აზრი, ალბათ, მის აზრს არ გავითვალისწინებ. შესაბამისად, მას არ ექნება ჩემს გადაწყვეტილებებზე გავლენა", — განაცხადა დეპუტატმა რუსთავი 2-თან ინტერვიუში.

გუშინ, 3 დეკემბერს, საქართველოს მოქმედმა პრეზიდენტმა, გიორგი მარგველაშვილმა არჩეულ პრეზიდენტ სალომე ზურაბიშვილთან შეხვედრის შემდეგ მოუწოდა მთავრობას აწარმოონ მოლაპარაკება ოპოზიციასთან. პრეზიდენტმა განაცხადა, რომ მზად არის ამ პროცესში თავადაც ჩაერთოს.

საპრეზიდენტო არჩევნებში დამარცხების შემდეგ გაერთიანებული ოპოზიცია და მათი კანდიდატი გრიგოლ ვაშაძე ვადამდელ საპარლამენტო არჩევნებსა და საარჩევნო კოდექსში ცვლილებების შეტანას ითხოვენ. 2 დეკემბერს მათ აქცია გამართეს და ხელისუფლებას დრო მისცეს სამუშაო ჯგუფის შესაქმნელად.

მათ თქმით, თუ 16 დეკემბრამდე განხილვა არ დაწყება აქციას გამართავენ. 16 დეკემბერს სალომე ზურაბიშვილის ინაუგურაციაა დაგეგმილი.