გიორგი მარგველაშვილმა შეიარაღებული ძალების ოფიცრებთან პრეზიდენტის რანგში ბოლო შეხვედრა გამართა. მან და პირველმა ლედიმ, მაკა ჩიჩუამ უშიშროების საბჭოს ორგანიზებით დღეს, 30 ნოემბერს ოფიცრების ყოველწლიურ შეკრებას უმასპინძლეს.

"უზარმაზარი პატივი იყო, ვყოფილიყავი თქვენი თანამებრძოლი და იმ შეიარაღებული ძალების უმაღლესი მთავარსარდალი, რომელიც ასახელებს ჩემს სამშობლოს", — აღნიშნა მარგველაშვილმა.

ამასთან, მარგველაშვილმა მადლობა გადაუხადა იმ სამხედრო მოსამსახურეებს, რომლებიც 2008 წლის რუსეთ-საქართველოს ომის დროს ქვეყანას იცავდა. ღონისძიების ფარგლებში გამოჩენილი განსაკუთრებული მამაცობისა და თავდადებისთვის ორდენებითა და მედლებით 112 სამხედრო მოსამსახურე დაჯილდოვდა.