წლების წინ დილით გაღვიძებას და სკოლაში წასვლას მხოლოდ ერთი პლიუსი ჰქონდა - რუსთავი 2-ის ეთერში ბავშვები 402-ე ოთახიდან გადიოდა და ყველას ერთი სული ჰქონდა გაეგო, როგორ გრძელდებოდა მისის გროუვსისა და ყველაზე ოხუნჯი სკოლის მოსწავლეების თავგადასავალი.

შოუს მაშინ მხოლოდ ერთი დანიშნულება - გართობა ჰქონდა, რეალურად კი 402-ე ოთახის ბავშვებს, დადებით თვისებებთან ერთად ძალიან, ძალიან ბევრი უარყოფითი მხარეც ჰქონდათ, ის, რასაც წლების წინ არ ან ვერ ვამჩნევდით.

მაშ ასე, იჩი ბაი, იჩი ბუ! წარმოგიდგენთ ექვს გაკვეთილს, რომელიც 402-ე ოთახის ბავშვებისგან არ უნდა ვისწავლოთ.

1. პოლი მაკშეინისგან არ უნდა ვისწავლოთ ადამიანების დაბეზღება

მიუხედავად იმისა, რომ პოლის თავისი სამშობლო, ლიტვა ძალიან უყვარს და მისგან ამ ქვეყნის შესახებაც ბევრი გავიგეთ, ის მაინც ქედმაღალი და ძალიან გამაღიზიანებელია. აქვე გეტყვით იმასაც, რომ პოლი სამაგალითო მეგობარი ნამდვილად არ არის და მისგან სანიმუშო ადამიანის შექმნაც ვერ გამოვა. აბეზარი ხასიათის გამო, არასდროს გასჭირვებია თანაკლასელების დაბეზღება დირექტორთან და კლასის დამრიგებელთან. შესაძლოა, სწორედ ეს გახდა იმის მიზეზიც, რომ პოლისთან მეგობრობა არავის სურს.

2. ნენსი ფრენსისისგან არ უნდა ვისწავლოთ, რომ ადამიანებს პოპულარობის გამო დავუმეგობრდეთ

მოდას აყოლილ ნენსის, მთელი სერიალის განმავლობაში ერთადერთი ოცნება აქვს - დაუმეგობრდეს პენის. ამის გამო, ის ხშირად ივიწყებს რეალურ მეგობრებს - ჯორდანს, ჯესის და გაბრიელას. კლასის ლიდერს ხშირად ახასიათებს უკიდურესობაში გადავარდნაც და მთლიანად შეპყრობილი ხდება ახალი გატაცებით. მაგალითად, შეუძლია კლასელებს იმის გამო დასცინოს, რომ არ აცვიათ ტრენდული ტანისამოსი, ან ფინანსური პრობლემების გამო ვერ ახერხებენ საყვარელი ჯგუფების კონცერტზე სიარულს.

3. ჯესი მაკკოისგან არ უნდა ვისწავლოთ, რომ საკუთარი სტატუსის ასამაღლებლად ყველაფერზე წავიდეთ

ჯესი სკოლის ყველაზე ზარმაცი მოსწავლეა. თუმცა, შეიძლება ითქვას, რომ მისი კომპლექსების დიდი ნაწილის მიზეზი დედამისია. მას თვალის დაუხამხამებლად შეუძლია გაანადგუროს სკოლის ინვენტარი მხოლოდ იმიტომ, რომ "კარგი ბიჭის" სტატუსი დაიმსახუროს.

4. ვინი ნასტასგან არ უნდა ვისწავლოთ ადამიანების დაცინვა

ჯესი და ვინი კლასის ყველაზე ხმაურიანი მოსწავლეები არიან. ერთი შეხედვით ისინი საუკეთესო მეგობრებიც არიან, თუმცა ვინი ხშირად დასცინის და ბოროტად ეხუმრება ჯესის. გარდა ამისა, მისი უკბილო ხუმრობების სამიზნე გარეგნობის, გენდერული თუ რასობრივი მიზეზით სკოლის სხვა მოსწავლეებიც ხდებიან.

5. არტურისგან არ უნდა ვისწავლოთ, რომ ცხოვრებაში მთავარი ფულია

არტური ზუსტად ის ადამიანია, რომლისგანაც საერთოდ არაფერი უნდა ისწავლოთ!გამდიდრებაზე მეოცნებე არტურს ერთადერთი მისია აქვს - რაც შეიძლება მეტი ფული წასცინცლოს თანაკლასელებს და ყველაფრისგან სარგებელი ნახოს.

6. მისტერ ბესერისგან საერთოდ არაფერი არ უნდა ვისწავლოთ

არაკომპეტენტური სკოლის დირექტორი, მისტერ ბესერი ყველაზე უპრინციპო ადამიანია მთელი სერიალის ისტორიაში . ის მოსწავლეებს ხშირად უმიზეზოდ სჯის და მათ საკუთარი მიზნებისთვის იყენებს. მის ძალიან ბევრ უარყოფით თვისებასთან ერთად, უნდა აღინიშნოს ერთი - მისტერ ბესერის მერკანტილური ხასიათი და სხვის ხარჯზე ცხოვრების დაუოკებელი სურვილი. ახლაც გაურკვეველია, როგორ მოახერხა მან ამ თანამდებობის მიღება.