საქართველოს პარლამენტის თავჯდომარემ რამდენიმე წუთის წინ საპრეზიდენტო არჩვენების მეორე ტურში მიიღო მონაწილეობა. ირაკლი კობახიძემ ამომრჩევლებს აქტიურობისკენ მოუწოდა. მისი თქმით, პირველ ტურში ცუდი შედეგი დაბალი აქტივობის ბრალი იყო.

"დღევანდელი არჩევანი არის ძალიან მარტივი, არის ორი პოლიტიკური ძალა, იქითა მხარეს არის ძალა, რომლის თვისებები არის აგრესია, სიძულვილი, სიცრუე, და მეორე მხარეს არის ძალა, რომელმაც ეს ყველაფერი ჩააბარა წარსულს", — ამბობს ირაკლი კობახიძე.

"აქედან გამომდინარე, დარწმუნებული ვარ, რომ არ გაუჭირდება საზოგადოებას არჩევანის გაკეთება და მინდა მოვუწოდო ყველას აქტიურობისკენ. მოგეხსენებათ, პირველ ტურში დაბალმა აქტივობამ განაპირობა ის, რომ ამ ნეგატიურმა ძალამ მიიღო საკმაოდ მაღალი შედეგი არჩევნებში. თუ იქნება მაღალი აქტიურობა, ამ შემთხვევაში პასუხიც იქნება მაქსიმალური", — თქვა პარლამენტის თავჯდომარემ.

ჟურნალისტებმა ირაკლი კობახიძეს საარჩევნო უბნებთან მობილიზებული კოორდინატორების შესახებაც ჰკითხეს. მან კოორდინატორებს მადლობა გადაუხადა მობილიზაციისთვის. მისი თქმით, პოლიტიკურ სუბიექტს უფლება აქვს აიღოს ოფიციალური სიები, მათ შორის ფოტოსურათიანიც.

"მე მინდა ჩვენს კოორდინატორებს რა თქმა უნდა მადლობა გადავუხადო მობილიზაციისთვის, ეს არის მათი პასუხისმგებლობა და მოვალეობა. პოლოტიკურ სუბიექტს აქვს უფლება, აიღოს ოფიციალური სიები, მათ შორის ფოტოსურათებიც, პირად ნომრებზე არ ვამბობ. ძალიან გთხოვთ ყველას, რუსთავი 2-ს განსაკუთრებით, ნუ ქმნიან აგრესიულ ფონს არჩევნებში. ჩვენ უნდა მივცეთ ამომრჩეველს საშუალება, რომ ხმა მისცენ მშვიდ გარემოში", — თქვა პარლამენტის თავდჯომარემ.

დღეს, 28 ნოემბერს საპრეზიდენტო არჩევნების შედეგებით გადაწყდება ვინ გახდება პრეზიდენტი ხელისუფლების მხარდაჭერილი კანდიდატი სალომე ზურაბიშვილი, თუ გრიგოლ ვაშაძე, რომელიც ნაციონალური მოძრაობის სახელით იყრის კენჭს.