საპრეზიდენტო ვადის ამოწურვამდე რამდენიმე დღით ადრე გიორგი მარგველაშვილი ექსპრეზიდენტის, მიხეილ სააკაშვილის არ შეწყალების მიზეზებზე საუბრობს. მისი თქმით, მასზე წლების განმავლობაში ამბობდნენ, რომ ნაციონალებს იწყალებს.

"სააკაშვილის, როგორც პრეზიდენტის გზა, არ არის რიგითი მოქალაქის გზა. ეს არაერთხელ მითქვამს მისთვის და ბუნებრივია, ყოველთვის ამაზე მოდიოდა ზღვარგადასაული აგრესია ნაციონალებისგან. სააკაშვილს არც მოქალაქეობა უნდა დაეთმო იმიტომ, რომ ორჯერ იყო ამ ქვეყნის მოქალაქე და უმაღლესი მთავარსარდალი. ამ ქვეყნის მოქალაქეებისთვის პატივი უნდა ეცა და არ დაეთმო. და მეორე, ქართული სასამართლოსთვის მას პასუხი უნდა გაეცა. ამ ქვეყნის პრეზიდენტი იყო და როდესაც კითხვებს უსვამდნენ და პასუხი გაეცა იმ სასამართლოსთვის, რომლის მეშვეობითაც 10-ობით ათასი ადამიანი ციხეში გაუშვა", — განაცხადა მარგველაშვილმა.

საქართველოს ყოფილ პრეზიდენტს ოთხ საქმეზე აქვს ბრალი წაყენებული. მათ შორის:

  • სახელმწიფო პოლიტიკური თანამდებობის მქონე პირის მიერ სამსახურებრივი უფლებამოსილების ბოროტად გამოყენებაზე;
  • 2007 წლის 07 ნოემბერს მომიტინგეთა მასობრივად დარბევის, ტელეკომპანია "იმედში" შეჭრისა და არკადი პატარკაციშვილის კუთვნილი ქონების დანაშაულებრივად ხელში ჩაგდების ფაქტზე;
  • სახელმწიფო-პოლიტიკური თანამდებობის მქონე პირის მიერ სამსახურებრივი უფლებამოსილების გადამეტებსა და ჯგუფურად ჯანმრთელობის განზრახ მძიმე დაზიანების ორგანიზებისთვის;
  • წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით, დიდი ოდენობით (8 837 461 ლარის) საბიუჯეტო თანხების გაფლანგვისთვის.