ქართული ოცნების დეპუტატების, ზაზა გაბუნიასა და მარიამ ჯაშის ინიციატივით, დედა ენა კანონის დონეზე ხდება ხელშეუხებელი. ამის შესახებ ზაზა გაბუნიამ ოფიციალურ ფეისბუქგვერდზე დაწერა.

On.ge-ს პარლამენტში განუცხადეს, რომ კანონპროექტის მიზანია იაკობ გოგებაშვილის დედა ენა ფორმალურ განათლებაში დაინერგოს და ბავშვებმა სწორედ ამ წიგნით ისწავლონ.

კანონპროექტით, ზოგადი განათლების შესახებ საქართველოს კანონში იგეგმება ცვლილება, რომლის მიხედვითაც განათლების სამინისტრო შექმნის ექსპერტთა კომისიას. აღნიშნული კომისია, დედა ენას, რომელსაც არამატერიალური ძეგლის სტატუსი აქვს მინიჭებული, გრიფირებაზე წარსადგენად მოამზადებს. დედა ენის გრიფირება სპეციალური წესით მოხდება და არა ზოგადით.

პარლამენტში კანონპროექტის მოტივაციასაც განმარტავენ და ამბობენ, რომ საქართველო მიერთებულია არამატერიალური კულტურული მემკვიდრეობის დაცვის შესახებ საერთაშორისო კონვენციას. ეს კონვენცია არამატერიალური კულტურული მემკვიდრეობის ძეგლების არა მხოლოდ დაცვას არამედ პრაქტიკაში დანერგვასაც გულისხმობს.

კანონპროექტი პარლამენტის ბიუროზე დღეს, 26 ნოემბერს უნდა დარეგისტრირებულიყო, თუმცა სხდოამა გადაიდო.