საბავშვო ევროვიზია 2018-ის გამარჯვებული პოლონეთი გახდა, რომელმაც ჟიურისგან და მაყურებლისგან ჯამში 215 ქულა დააგროვა, საფრანგეთის წარმომადგენელმა კი 203 ქულით მეორე ადგილი დაიკავა.

საქართველოს წარმომადგენელი, თამარ ედილაშვილი სიმღერით "შენი ხმა", 144 ქულით მე-8 ადგილზე გავიდა.

საბავშვო ევროვიზია 2018 ბელარუსში, ქალაქ მინსკში, დღეს, 25 ნოემბერს გაიმართა, რომელსაც საზოგადოებრივი მაუწყებლის პირდაპირ ეთერში ქართველი მაყურებელიც ადევნებდა თვალს.

აღსანიშნავია, რომ საქართველო საბავშვო ევროვიზიის გამარჯვებული სამჯერ გახდა და საბავშვო ევროფესტივალის გამარჯვებულ ქვეყნებს შორის რეკორდი დაამყარა. მსგავსი შედეგი ამ დრომდე არც ერთ ქვეყანას ჰქონია.