საქართველოში არ შემოუშვეს ცნობილი რუსი მწერალი ვიქტორ ეროფეევი, რომელიც მიმდინარე წლის მაისში თბილისში იყო ჩამოსული. შემთხვევა გუშინ, 23 ნოემბერს მოხდა.

შინაგან საქმეთა სამინისტროში On.ge-ს განუცხადეს, რომ ქვეყანაში შემოსვლაზე ეროფეევს უარი ეთქვა უცხოელთა და მოქალაქეობის არმქონე პირთა სამართლებრივი მდგომარეობის შესახებ საქართველოს კანონის მე-11 მუხლის 1-ლი პუნქტის "ი" ქვეპუნქტის საფუძველზე. აღნიშნული პუნქტი გულისხმობს, რომ მას უარი ეთქვა "საქართველოს კანონმდებლობით გათვალისწინებულ სხვა შემთხვევებისთვის". შსს არ განმარტავს, კონკრეტულად რის გამო არ შემოუშვეს ერაფეევი საქართველოში.

2017 წლის ოქტომბერში ეროფეევი დე ფაქტო აფხაზეთის რესპუბლიკაში ფესტივალს პაემანი რუსეთთან ესრწებოდა.

საქართველოში მოქმები ოკუპირებული ტერიტორიების კანონის მიხედვით უცხო ქვეყნის მოქალაქეებისთვისა და მოქალაქეობის არმქონე პირებისათვის ოკუპირებულ ტერიტორიებზე შესვლა დაშვებულია მხოლოდ ორ შემთხვევაში:

  • აფხაზეთის ავტონომიური რესპუბლიკის ტერიტორიებზე - ზუგდიდის მუნიციპალიტეტის მიმართულებიდან;
  • ცხინვალის რეგიონში - გორის მუნიციპალიტეტის მიმართულებიდან.

სხვა ნებისმიერ შემთხვევაში ოკუპირებულ ტერიტორიებზე აკრძალულია და ისჯება საქართველოს სისხლის სამართლის კოდექსით. ოკუპირებული ტერიტორიების შესახებ კანონის დარღვევას ხანდაზმულობის ექვსწლიანი ვადა აქვს.

On.ge-მ ჰკითხა შსს-ს, თუ როგორ მოახერხა ეროფეევმა მაისში თბილისში ჩამოსვლა მაშინ, როდესაც წინა წელს აფხაზეთში იმყოფებოდა. ამასთან დაკავშირებით On.ge უწყებისგან პასუხს ელოდება.

ეროფეევის საქართველოში არშემოშვების შესახებ მწერალმა, დათო ტურაშვილმა გადაცემა სხვა შუადღეში ისაუბრა. მისივე თქმით, გაუგებარია რატომ უთხრეს მწერალს შემოსლაზე უარი ახლა, როდესაც ის მაისში იყო ჩამოსული. ტურაშვილი აღნიშნულ შემთხვევას პოლიტიკურ გადაწყვეტილებას უწოდებს.