საქართველოს კომუნიკაციების ეროვნულმა კომისისამ რუსთავი 2 გაერთიანებული ოპოზიციის საპრეზიდენტო კანდიდატის, გრიგოლ ვაშაძის პოლიტიკური რეკლამის უკანონო განთავსების გამო წერილობით გააფრთხილა. კომისიის ცნობით, რუსთავი 2-ს მეორე ტურის დანიშვნამდე ეთერში პოლიტიკური რეკლამის განთავსების უფლება არ ჰქონდა, რადგან ჯერ არ იყო დადგენილი, თუ ვინ გადავიდოდა მეორე ტურში.

განცხადებაში წერია, რომ 10 და 11 ნოემბერს რუსთავი 2-მა ეთერში გაუშვა რეკლამა, რომელიც ვაშაძის მხარდაჭერას და "პრეზიდენტობის ერთ-ერთი კანდიდატის არჩევისთვის ხელის შეშლას ემსახურებოდა". კომისიის ცნობით, მაუწყებლობის შესახებ საქართველოს კანონი რეკლამის განთავსებისა და პოლიტიკური პარტიისგან დაფინანსების მიღებით დაირღვა.

ამასთანავე, კომუნიკაციების ეროვნულმა კომისიამ ობიექტივს ფინანსური ჯარიმა დააკისრა, რადგან მაუწყებელმა ეთერში სოციალური რეკლამის სტატუსით პოლიტიკური შინაარსის რეკლამა განათავსა.

განცხადების მიხედვით, 7 ნოემბერს ობიექტივმა გაუშვა რეკლამა, რომელშიც ისმოდა მოწოდება სალომე ზურაბიშვილის მხარდაჭერის შესახებ, ერთ-ერთი რგოლი კი სხვა საპრეზიდენტო კანდიდატის არჩევის ხელის შეშლისკენ იყო მიმართული. იმის გამო, რომ ასეთივე დარღვევა ობიექტივს ერთი წლის განმავლობაში ჰქონდა, მედიასაშუალებას ამჯერად ფინანსური ჯარიმა დაეკისრა.