პარტია ქართული ოცნების თავმჯდომარე ბიძინა ივანიშვილი ირწმუნება, რომ საბანკო ვალების ჩამოწერის ინიციატივა არჩევნებს არ უკავშირდება და ამის შესახებ დაპირება თავად ჯერ კიდევ მაისში გასცა.

მისი თქმით, სწორედ სიღარიბის დონის გაზრდის გამო მისცა საჯარო შენიშვნა კვირიკაშვილს, რადგან მან რეფორმები დააგვიანა.

"საზოგადოებას დავპირდი, რომ წლის ბოლომდე დავეხმარებოდით და ნუ ჩათვლიან საარჩევნოდ", — განაცხადა ივანიშვილმა ტელეკომპანია იმედის ეთერში.

მისი თქმით, ე.წ. შავი სიის პროცესი გაგრძელდება და ის ერთ წელში დაანახვებს მსოფლიოს, თუ როგორი დემოკრატია შეიძლება აშენდეს ქვეყანაში.

"ერთი გადახვევის უფლება არ გვაქვს. ხალხმა უნდა იგრძნოს, რომ თუ გაჭირვებულები ვართ, ერთად ვართ. ერთი წლის განმავლობაში გაჩვენებთ არა მარტო საქართველოს, არამედ ევროპასაც, თუ როგორი დემოკრატია შეიძლება აშენდეს საქართველოში. მე მაქვს პრეტენზია, ერთი წლის განმავლობაში საზოგადოება დავარწმუნო, რომ ეს იქნება სახალხო ხელისუფლება. პარტია იქმნება იმისთვის, რათა იზრუნოს ხალხზე. კეთილი ვინებოთ და დაპირებები შევასრულოთ, მე ერთი წელი მექნება საშუალება ვისაუბრო ხალხთან", — განაცხადა ბიძინა ივანიშვილმა.

საბანკო ვალის განულების ინიციატივა

19 ნოემბრის საგანგებო ბრიფინგზე პრემიერმა მამუკა ბახტაძემ ე.წ. შავ სიაში მყოფი 600 ათასი ადამიანისთვის ჯამში 1,5 მილიარდი ლარის ვალის განულებაზე ისაუბრა.

პირობები, რომელსაც ვალის ჩამოსაწერად პირი უნდა აკმაყოფილებდეს:

  • თითოეულ ფინანსურ კომპანიაში ვალის ძირი თანხის მოცულობა არ უნდა აღემატებოდეს 2 000 ლარს, თუმცა შესაძლოა, ჯამში 2 000 ლარზე გაცილებით მეტი იყოს;
  • მინიმუმ ბოლო ერთი წლის განმავლობაში არ გადახდილა სესხის ნაწილი.

ვის არ ჩამოეწერება ვალი:

  • ვივუსის კლიენტებს. ფინანსთა მინისტრის თქმით, ამ კომპანიასთან ვერ შეთანხმდნენ;
  • ვისი ვალის ძირი თანხაც 2 000 ლარს აჭარბებს.

ბახტაძის ინფორმაციით, ე.წ. შავ სიაში მყოფილი ადამიანების 95 პროცენტს სწორედ 2 000 ლარამდე "ძირი თანხის" მქონე დავალიანება აქვთ.

პრემიერ-მინისტრის ბრიფინგამდე ერთი დღით ადრე, გაერთიანებული ოპოზიციის ძალა ერთობაშიას საპრეზიდენტო კანდიდატმა, გრიგოლ ვაშაძემ საქართველოს მთავრობასა და ეროვნული ბანკის მოსთხოვა, რომ ე.წ. შავი სიიდან ამოიღონ ის მოქალაქეები, რომლებიც ვერ იხდიან კრედიტებს. საბანკო დავალიანებების შესახებ ინიციატივა საპრეზიდენტო კანდიდატმა 18 ნოემბერს მათივე შტაბში გამართულ პრესკონფერენციაზე გააჟღერა.

გრიგოლ ვაშაძის ბრიფინგს ბრიფინგითვე უპასუხა თბილისის მერმა, კახა კალაძემ. მისი თქმით, საქართველოს მთავრობა 19 ნოემბერს "მასშტაბურ გადაწყვეტილებას" გამოაცხადებდა. კალაძის თქმით, ნაციონალურმა მოძრაობამ ქართულ ოცნებას დაასწრო და კლოუნადა მოაწყო, რომელიც ქართული ოცნების ინიციატივის "შოკით" იყო გამოწვეული.