საქართველოს ყოფილი პრეზიდენტი მიხეილ სააკაშვილი, ფეისბუქის საკუთარ გვერდზე წერს, რომ "გული ერევა ყველანაირ ანტისემიტიზმზე". მას შემდეგ, რაც სააკაშვილმა ქართული ოცნების პიარტექნოლოგი "ებრაელ აფერისტად" მოიხსენია, პლატფორმამ არა ფობიას! მისი განცხადება ანტისემიტიზმად შეაფასა. მიხეილ სააკაშვილის თქმით, საერთაშორისო გამჭვირვალობა — საქართველოს ხელმძღვანელს, ეკა გიგაურს არ ესმის ტერმინი ანტისემიტიზმის მნიშვნელობა:

"ამ ბრალდებას არ მივიღებ არც მისგან და არც ნებისმიერი სხვა არასამთავრობო ორგანიზაციის მხრიდან. ასევე, მინდა დავადასტურო, რომ შევეწინააღმდეგები ჩემს ქვეყანაში ნებისმიერი მოქალაქეობის მქონე "შავი პიარის სპეციალისტ" აფერისტების ბოგინს, რა ლოზუნგებითაც არ უნდა დამიპირისპირდნენ და რა სახელი და გვარიც არ უნდა ჰქონდეთ მათ".

სამოქალაქო პლატფორმა "არა ფობიას!" ექსპრეზიდენტის, მიხეილ სააკაშვილის კიდევ ერთ დისკრიმინაციულ განცხადებას ეხმაურება და ანტისემიტურად აფასებს. არასამთავრობოები ამბობენ, რომ სააკაშვილის განცხადება "ებრაელ აფერისტზე" სტერეოტიპებს აძლიერებს:

"განმარტების თანახმად, ანტისემიტიზმი არის განსაზღვრული წარმოდგენები ებრაელებზე, რაც გამოიხატება ებრაელების მიმართ სიძულვილში. ანტისემიტიზმი ასევე მიაწერს ებრაელებს სტერეოტიპულ და უარყოფით პიროვნულ თვისებებს. ამ შემთხვევაში თაღლითობის (აფერისტობა) დაკავშირება ადამიანის ებრაულ წარმოშობასთან, გამოხატავს სტერეოტიპულ შეხედულებებს ებრაელთა თაობაზე", — წერია არასამთავრობოების განცხადებაში.

მათივე თქმით, სააკაშვილის მხრიდან ეს არ ყოფილა ანტისემიტისტური გამოხატვის პირველი შემთხვევა. 14 ივნისს ექსპრეზიდენტმა პარტია ქართული ოცნების დეპუტატზე შოთა შალელაშვილზე საუბრისას განაცხადა:

"შეუთვალეთ მოკითხვა აფერისტ მის [ივანიშვილის] ჩამოყვანილ რუს ებრაელს, რომელიც რატომღაც საქართველოს მოქალაქე აღმოჩნდა, იმიტომ რომ... დაბოლოება აქვს გვარით, მაგრამ საქართველოსთან არაფერი მიმართება არ ჰქონია".