ე.წ. ტერაქტის ორგანიზების ბრალდებით ერთ-ერთ დაკავებულ პირთან დაკავშირებით, სახალხო დამცველმა საგანგებო ბრიფინგი გამართა. ნანუაშვილის თქმით, ერთ-ერთი დაკავებულის სამედიცინო ბარათიდან ირკვევა, რომ მის მიმართ სამართალდამცავების მხრიდან შესაძლო არასათანადო მოპყრობის ფაქტს ჰქონდა ადგილი, რის გამოც ნანუაშვილმა გამოძიების დაწყების მოთხოვნით მთავარ პროკურორს მიმართა.

სახალხო დამცველი ამბობს, რომ ბრალდებულის სამედიცინო ბარათიდან და მონაყოლიდან ირკვევა შემდეგი:

"დაკავებისას ბრალდებული არასათანადო მოპყრობას დაექვემდებარა. კერძოდ, შუბლის ძვალი ჩაუმტვრიეს კონდახით, რის გამოც გონება დაკარგა და არ ახსოვს, როდის გადაუმტვრიეს თითები. ამასთან, ბრალდებულის მტკიცებით ის 20 აგვისტოს, დაახლოებით 12 საათზე დააკავეს და მიუხედავად თავის ქალის ჭრილობისა და მარცხენა ხელის მტევნის დაზიანებისა, ღამის დაახლოებით 11 საათამდე მას არანაირი სამედიცინო დახმარება არ აღმოუჩინეს.

სამედიცინო დოკუმენტები ცხადყოფს, რომ ბრალდებული დაახლოებით 23 საათზე დროებითი მოთავსების იზოლატორში შეიყვანეს, თუმცა იზოლატორმა ის არსებული მრავლობითი დაზიანების გამო ვერ მიიღო. აღნიშნულის გამო, ბრალდებული სამედიცინო დაწესებულებებში 2-ჯერ გადაიყვანეს, სადაც საბოლოო ჯამში, ქირურგიული მკურნალობა ჩაუტარდა".

22 აგვისტოს სახელმწიფო უსაფრთხოების სამსახურმა განაცხადა, რომ კონტრდაზვერვის დეპარტამენტმა ტერორისტული აქტი აღკვეთა, რომლის შედეგადაც სოფელ საგურამოს მიმდებარე ტერიტორიაზე, მდინარე არაგვზე გამავალი რუსეთ-სომხეთის დამაკავშირებელი გაზსადენი მილის ღია მონაკვეთის აფეთქება იგეგმებოდა. ტერაქტის მომზადების ბრალდებით დღეს შვიდი პირი დააკავეს.

აღნიშნულ პირებს წინასწარი ატიმრობა შეუფარდეს, მათი წინასასამართლო სხდომა 10 ოქტომბერს გაიმართება.