მას შემდეგ, რაც ჯანმრთელობის გაუარესების გამო, ნატა ფერაძემ შიმშილობა შეწყვიტა, თბილისის მერიასთან მის ნაცვლად შიმშილობას ელენე მალაშევსკი-ჯაყელი აგრძელებს:

"დღეს მე დავიწყე უკვე შიმშილობა, იგივე მოთხოვნებით. ვითხოვთ ეკოლოგიისა და გამწვანების სამსახურის უფროსის და მისი მოადგილის თანამდებობიდან გადადგომას. ეს არ არის ერთი კონკრეტული შემთხვევა, ეს არის წლების განმავლობაში განადგურებული მწვანე საფარი, რაზეც აუცილებად უნდა აგოს პასუხი ამ სამსახურმა, რომელსაც ევალება მისი დაცვა".

ნატა ფერაძემ უვადო შიმშილობა 17 აგვისტოს თბილისის მერიასთან დაიწყო. მისი მთავარი მოთხოვნა ეკოლოგიისა და გამწვანების სამსახურის თანამშრომლების გათავისუფლება და კვალიფიციური კადრების აყვანა, ასევე ქალაქში მიმდინარე ეკოპროცესების მკაცრი იურიდიული გამოძიებაა.

როგორც პარტიზანული მებაღეობის ერთ-ერთმა წევრმა, მარიამ ბაქრაძემ On.ge-ს დღეს განუცხადა, მას შემდეგ, რაც ნატა ფერაძემ რამდენჯერმე იგრძნო თავი შეუძლოდ, ის რესპუბლიკურ საავადმყოფოში გადაიყვანეს, მოგვიანებით კი სახლში გაწერეს. ბაქრაძის თქმით, სწორედ ამიტომ ფერაძემ შიმშილობა შეწყვიტა.

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს.

სულ მოჭრილია 13 წიწვოვანი ხე. ფაქტის გასაპროტესტებლად ადგილზე შეიკრიბნენ ადგილობრივი მაცხოვრებლები და პარტიზანული მებაღეობის წარმომადგენლები