ქართული ოცნების დეპუტატის, ეკა ბესელიას განცხადებით, გამოხატვის თავისუფლება აბსოლუტური არ არის და შეზღუდვის პროპორციულობაა მნიშვნელოვანი. ამის შესახებ დეპუტატმა რუსთაველის გამზირზე 10 ნოემბერს მიმდინარე პროტესტის შეფასებისას განაცხადა.

"იმის გათვალისწინებით, რომ გამოხატვის და შეკრების უფლება აბსოლუტური უფლება არ არის და ის შეიძლება შეიზღუდოს ცალკეულ შემთხვევებში, სწორედ ამ შეზღუდვის პროპორციულობაზე შეიძლება ვისაუბროთ. როცა პოლიციელები მოქმედებენ, ამბობენ რომ აქვთ ინფორმაცია, რომელიც შეიძლება იყო საზოგადოებრივი უსაფრთხოების კუთხით მნიშვნელოვანი, მათ უნდა შეაფასონ არის თუ არა ამ უფლების შეზღუდვა აუცილებელი", —განაცხადა დეპუტატმა.

მისი თქმით, სახელმწიფომ უნდა უზრუნველყოს, რომ გამოხატვის უფლება ჰქონდეს ყველას.

"გამოხატვის თავისუფლების დაცვას ჩვენ უზრუნველვყოფთ, მაგრამ თუ შევზღუდავთ გაკეთდება განმარტებები",— ამბობს ეკა ბესელია.

ის ასევე ხაზს უსვამს მართლმსაჯულებისა და პოლიტიკური პროცესის ერთმანეთისგან გამიჯვნის მნიშვნელობას.

"მართლმსაჯულება უნდა განხორციელდეს მიკერძოების გარეშე, სამართლიანად. ჩვენ პოლიტიკური ორგანო პარლამენტი ვერავის ვერ დაიჭერს და ვერ გაათავისუფლეს მოთხოვნა, რომ პოლიტიკურმა ორგანომ მიიღოს გადაწყვეტილებამ რომელიც ვიღაცის უფლებას შეზღუდავს არ არის სწორი", — განაცხადა ბესელიამ.

თბილისის მერიამ 5 ნოემბერს შვილმკვდარ მამას, ზაზა სარალიძეს, რომელიც შვილის მკვლელების დასჯას ითხოვს, წერილი მისწერა. წერილში მერია ითხოვს, რომ სარალიძემ აქცია თბილისში, პარლამენტის შენობის მიმდებარე ტერიტორიის ნაცვლად სხვა ადგილზე გამართოს.

ამ საკითხთან დაკავშირებით დასმული კითხვის საპასუხოდ თბილისის მერმა, კახა კალაძემ განაცხადა, რომ დედაქალაქი საახალწლოდ ემზადება და ამ ადგილის გამოყენება შეუძლებელი იქნება. როგორც მერი განმარტავდა, აქციის მონაწილეებს შეუძლიათ სხვა ადგილი იპოვონ.

ზაზა სარალიძისთვის კონსტიტუციური უფლების, კარვის გაშლის უფლების შეზღუდვის გამო 10 ნოემბერს აქცია გამართეს არასამთავრობო ორგანიზაციებმა. პოლიციის წინააღმდეგობის მიუხედავად, თბილისში, რუსთაველის გამზირზე, პარლამენტის შენობის წინ არასამთავრობოებმა პროტესტის ნიშნად კარვები მაინც გაშალეს. ასევე შეიქმნა პეტიცია "უარს ვამბობ ნაძვის ხეზე, ვირჩევ ადამიანს!".

თბილისის მერმა კახა კალაძემ ბრიფინგი გამართა, სადაც განაცხადა, რომ დეზინფორმაციაა, თითქოს სარალიძეს კარვის აღება საახალწლო ნაძვის ხის გამო მოსთხოვეს. მისი თქმით, ეს იყო რეკომენდაცია, რომლის გათვალისწინებაც აქციის მონაწილეების პრეროგატივაა. ზაზა სარალიძისა და მალხაზ მაჩალიკაშვილის თქმით, ეს არ იყო რეკომენდაცია და მათ მოითხოვეს კარვების აღება პარლამენტის მიმდებარე ტერიტორიიდან. ზაზა სარალიძის თქმით, კახა კალაძე თავის მართლების პოზიციაშია და თავისი ნათქვამის გამოსწორებას ცდილობს.