პოლიტიკური პარტია ცენტრისტების წევრები თემურ ხაჩიშვილი და ვლადიმერ ბედუკაძე არჩევნებში მონაწილეობას სხვა პარტიის სახელით მიიღებენ. ისინი საქართველოს კომუნისტური პარტია – სტალინელებთან გაერთიანდნენ. ამის შესახებ თემურ ხაჩიშვილმა დღეს გამართულ ბრიფინგზე განაცხადა.

"რა სახელით მივიღებთ არჩევნებში მონაწილეობას და ვინ იქნება ჩვენი პარტიის ლიდერი, ამას ძალიან მალე გაიგებთ. მიმდინარეობს ტექნიკური სამუშაოები. რაც შეეხება ჩვენს გაერთიანებას, ეს რა თქმა უნდა გამოიწვია საერთო ღირებულებებმა და ფასეულობებმა. ჩვენზე მიმდინარეობს მიზანმიმართული ბრძოლა და ხელისუფლებას მოვუწოდებ ხელი არ შეგვიშალონ ისე, როგორც ამას ჰქონდა ადგილი".

თემურ ხაჩიშვილმა აღნიშნა, რომ ცენტრისტების წინასაარჩევნო დაპირებები ახალი პარტიის შემადგენლობაშიც ძალაში რჩება.

"სამწუხაროდ, ჩვენ არ გვაცადეს საზოგადოებისთვის მიგვეწოდებინა სწორი ინფორმაცია, თუ რას განვახორციელებთ და ათწამიანი რეკლამის გამო დაიწყეს ჩვენს წინააღმდეგ ბრძოლა. ყველა ის დაპირება, რომელსაც ჩვენ გავცემდით, რჩება ძალაში, ეს იმას არ ნიშნავს, რომ ჩვენ ვიქნებით რუსეთის მონები, მაგრამ მათთან გვექნება კარგი ურთიერთობა".

ცენტრალურმა საარჩევნო კომისიამ ლადო ბედუკაძის პარტია - ცენტრისტები რეგისტრაციიდან 16 აგვისტოს მოხსნა.