ტერაბანკი კიდევ ერთი ახალი და საინტერესო ინიციატივის, სტარტაპ ანბანის მხარდამჭერი გახდა. პროექტი, რომელიც 11-13 წლის ბავშვებისთვისაა განკუთვნილი, სახალისო, მარტივ ენაზე შედგენილ სატრენინგო კურსსა და სხვადასხვა ღონისძიებას აერთიანებს.

სტარტაპ ანბანი ბავშვებში მეწარმეობის პოპულარიზაციასა და მათთვის ელემენტარული სამეწარმეო უნარების სწავლებას ისახავს მიზნად. პროექტის განმავლობაში მონაწილეები საკუთარ იდეებს თამაშის მეშვეობით განავითარებენ და პროდუქტებს შექმნიან, რომლებსაც 22-23 დეკემბერს, ფაბრიკაში გამართულ საშობაო გამოფენაზე თავადვე წარადგენენ და გაყიდიან.

"ტერაბანკისთვის მცირე თუ საშუალო ბიზნესისა და ამ მიმართულების სტარტაპების მხარდაჭერა განსაკუთრებული პრიორიტეტია. მით უმეტეს მაშინ, როდესაც ინიციატივა ბავშვებში მეწარმეობის უნარების განვითარებასა და ადრეული ასაკიდანვე საკუთარი ბიზნესის წახალისებას გულისხმობს. ინოვაციებისა და ტექნოლოგიების სააგენტოსთან თანამშრომლობის ფარგლებში, გაზაფხულიდან ჩვენ სტარტაპ მეგობრულის სტატუსი გვაქვს და ახლა ამ პროექტის მხარდაჭერაშიც სიამოვნებით ვმონაწილეობთ", - აცხადებენ ტერაბანკში.

სატრენინგო კურსი 5 შეხვედრას მოიცავს. თითოეულ მათგანს პროფესიონალი მენტორი გაუძღვება. ინიციატივა ტექნოპარკში გასვლით საინფორმაციო-შემეცნებით ექსკურსიასაც აერთიანებს. პროექტში მონაწილეობა უფასოა. 20 კანდიდატი განაცხადების საფუძველზე შეირჩევა. განაცხადების მიღების ბოლო ვადა 11 ნოემბრია.

ტერაბანკი ქართულ საბანკო ბაზარზე 1999 წლიდან ფუნქციონირებს. ბანკის მთავარი აქციონერი არაბეთის გაერთიანებული საემიროების კულტურის, ახალგაზრდობისა და საზოგადოებრივი განვითარების მინისტრი შეიხი ნაჰაიან მაბარაქ ალ ნაჰაიანია, რომელსაც საქართველოში საბანკო და სასტუმრო ბიზნესის მიმართულებით 250 მილიონი დოლარის ინვესტიცია აქვს განხორციელებული.