წყნარ ოკეანეში ახალი კალედონიის რეგიონის მოსახლეობამ საფრანგეთის შემადგენლობაში დარჩენა გადაწყვიტა. დამოუკიდებლობის რეფერენდუმი რეგიონში დღეს, 4 ნოემბერს ჩატარდა.

მოსახლეობის 56,4 პროცენტმა დამოუკიდებლობას მხარი არ დაუჭირა. როგორც ცნობილია, ამომრჩეველთა აქტივობამ 81 პროცენტი შეადგინა. საფრანგეთის პრეზიდენტმა, ემანუელ მაკრონმა განაცხადა, რომ ამაყობს, რომ ეს ისტორიული მომენტი ერთად გაიარეს.

ახალი კალედონიის მოსახლეობა დაახლოებით 270 ათასია, მათგან დიდ ნაწილს მკვიდრი მოსახლეობა, კანაკები წარმოადგენენ. საფრანგეთის ზღვისიქითა ტერიტორია ყოველწლიურად ცენტრალური ხელისუფლებისგან 1, მილიარდ დოლარს იღებს. კუნძულებს პარლამენტში ორი დეპუტატი და ორი სენატორი ჰყავს.

ახალ კალედონიაზე საფრანგეთის ხელისუფლებას წარმოადგენს უმაღლესი კომისარი, რომელსაც ნიშნავს საფრანგეთის პრეზიდენტი. აღმასრულებელ ხელისუფლებას ასრულებს ადგილობრივი მთავრობა, რომელიც ინიშნება ადგილობრივი პარლამენტის მიერ. პარლამენტს ყოველ ოთხ წელიწადში ერთხელ ირჩევს მოსახლეობა და მასში 54 დეპუტატი შედის.

საფრანგეთმა კუნძულების საკუთრებაზე პირველად 1853 წელს განაცხადა და ერთ დროს გამოსასწორებელ კოლონიად იყენებდა. 1980-იან წლებში საფრანგეთის ჯარებსა და კანაკებს შორის დაპირისპირება იყო.

დამოუკიდებლობის პირველი რეფერენდუმი 1988 წელს გაიმართა. შეთანხმების თანახმად, 2022 წლამდე შესაძლოა, კიდევ ორი რეფერენდუმი ჩატარდეს.