პარტია ქართული ოცნების დეპუტატი, არჩილ თალაკვაძე რესპუბლიკური პარტიის მხრიდან მეორე ტურში გრიგოლ ვაშაძის მხარდაჭერას გამოეხმაურა და თქვა, რომ ლევან ბერძენიშვილმა და ამ პარტიის ლიდერებმა დაიჯერეს სააკაშვილის მიერ თავზე ხელის გადასმა.

"მათთვის ეს აღმოჩნდა უფრო მაღალი ღირებულება, ვიდრე თავისუფლება, დემოკრატია და ის პრინციპები, რისთვისაც თავის დროზე, ოპოზიციაში ყოფნის დროს ქართული ოცნება და მთელი საზოგადოება დაუპირისპირდა ნაციონალური მოძრაობის მმართველობის სტილს" —– განაცხადა ქართული ოცნების ცენტრალურ ოფისში გამართულ ბრიფინგზე არჩილ თალაკვაძემ.

არჩილ თალაკვაძისთვის რესპუბლიკური პარტიის გადაწყვეტილება გაუგებარია.

"არ ვფიქრობ, რომ მცირე და დაბალრეიტინგული პოლიტიკური პარტიების განცხადებები რამეს გააძლიერებს ან შეასუსტებს. რესურსების ბალანსი არ იცვლება. ქართულ ოცნებას სალომე ზურაბიშვილთან ერთად ექნება ბევრად მაღალი შედეგი მეორე ტურში", — განაცხადა არჩილ თალაკვაძემ.

რესპუბლიკური პარტია საპრეზიდენტო არჩევნების მეორე ტურში მხარს გრიგოლ ვაშაძეს დაუჭერს. ამ საკითხზე პარტია გრიგოლ ვაშაძესთან კონსულტაციები უკვე გამართა. ლევან ბერძენიშვილმა თქვა, რომ მიხეილ სააკაშვილს აპატია, რადგან მან პატიება ითხოვა.