საქართველოს პრეზიდენტი, გიორგი მარგველაშვილი მოუწოდებს ხელისუფლებას შეასრულოს დაპირება და შექმნას სტრუქტურა, რომელიც უშიშროების საბჭოს ჩაანაცვლებს. ამის საჭიროებაზე გიორგი მარგველაშვილმა საქართველოს თავდაცვისა და უშიშროების კონფერენციაზე ისაუბრა.

პრეზიდენტმა კიდევ ერთხელ გააკრიტიკა მმართველი გუნდის მიერ უშიშროების საბჭოს გაუქმება და თქვა, რომ საქართველო არ არის ქვეყანა, რომელსაც შეუძლია "ფეხი ფეხზე გადაიდოს და დაელოდოს, რომ როდესმე რაღაც შეიქმნება".

"უმნიშვნელოვანესი პოლიტიკური სტრუქტურა უშიშროების საბჭო წლების განმავლობაში იყო ფორმატი და ფორუმი, რათა ქვეყანაში თავდაცვისუნარიანობასთან დაკავშირებით პოლიტიკურად გაერთიანებული გადაწყვეტილებები მიღებულიყო. ასეთი სტრუქტურის არარსებობა ჩვენს სახელმწიფო სისტემაში არის ის სირთულე, რომელიც აღიარებულია ჩვენი პარტნიორების მიერ", — განაცხადა გიორგი მარგველაშვილმა კონფერენციაზე სიტყვით გამოსვლისას.

პრეზიდენტის თქმით, პოლიტიკურმა გუნდმა, რომელმაც შეწყვიტა კონსტიტუციაში უშიშროების საბჭოს არსებობა თქვა, რომ შემცვლელ სტრუქტურას შეიმუშავებდა.

"სამწუხაროდ, ეს ასე არ მოხდა. ჩვენ წლის ბოლომდე გვეყოლება ახალი პრეზიდენტი, გვექნება ახალი კონსტიტუცია და არ გვექნება უშიშროების საბჭო. მიუხედავად წარმატებებისა, თავდაცვისუნარიანობის გაძლიერების თვალსაზრისით, მიუხედავად იმისა, რომ ჩვენი მებრძოლების კვალიფიკაცია ყოველდღიურად იმატებს და ღრმავდება კოორდინაცია ჩვენს პარტნიორებთან, აუცილებელია სტრუქტურა, სადაც უმაღლესი თანამდებობის პირები მიიღებენ პოლიტიკურ გადაწყვეტილებებს", — განაცხადა პრეზიდენტმა.

მას მიაჩნია, რომ იმ მნიშვნელოვანი გადაწყვეტილებების ფონზე, რაც თავდაცვის სისტემაშია, უშიშროების საბჭოს მსგავსი სტრუქტურა "რუტინაა".

"სასწრაფოდ და ინტენსიურად შესრულდეს დაპირება, რომ უშიშროების საბჭოს ჩაანაცვლეს ახალი სტრუქტურა", — განაცხადა პრეზიდენტმა.

საქართველოს ახალი კონსტიტუციით გაუქმდა ეროვნული უშიშროების საბჭო, რომელიც სამხედრო აღმშენებლობისა და ქვეყნის თავდაცვის ორგანიზაციისათვის შეიქმნა და, რომელსაც საქართველოს პრეზიდენტი ხელმძღვანელობდა. ახალი კონსტიტუცია ძალაში საქართველოს ახალი პრეზიდენტის ინაუგურაციის შემდეგ შევა.