"მე მივეცი ხმა პრეზიდენტობის კანდიდატს, რომელიც იქნება ყველას პრეზიდენტი. არ შეეშინდება, რომ იყოს ყველას, საქართველოს ყველა მოქალაქის პრეზიდენტი", — განაცხადა საქართველოს პრეზიდენტმა, გიორგი მარგველაშვილმა ხმის მიცემის შემდეგ.

მარგველაშვილმა ისაუბრა მთავარსარდლის ფუნქციებზე და განაცხადა, რომ მომავალი პრეზიდენტი ამაყი იქნება იმით, რომ უხელმძღვანელებს ასეთ შეიარაღებულ ძალებს.

საკუთარი არჩევანი უკვე დააფიქსირეს მოქმედმა და ექს პრემიერ-მინისტრებმა და პატრიარქმა. ასევე ევროპული საქართველოს და ლეიბორისტული პარტიის საპრეზიდენტო კანდიდატებმა.

ცენტრალური საარჩევნო კომისიის ინფორმაციით, არჩევნები 3 703 უბანზე ტარდება. მათ შორის 55 საზღვარგარეთ, 11 კი საგამონაკლისო წესით შექმნილი უბანია.

ცესკოში ამბობენ, რომ ამომრჩეველთა საერთო რაოდენობა 3 518 877 ადამიანს შეადგენს, რომელშიც შედის საზღვარგარეთ რეგისტრირებული 14 795 მოქალაქე.