გაერთიანებულ ოპოზიცია და ევროპული საქართველო მეორე ტურში გასვლის შემთხვევაში ერთმანეთს მხარდაჭერისკენ მოუწოდებენ. თავდაპირველად ევროპული საქართველოს წევრმა, გიგა ბოკერიამ დაუსვა კითხვა გაერთიანებული ოპოზიციის საპრეზიდენტო კანდიდატს, გრიგოლ ვაშაძეს დაუჭერს თუ არა ის მხარს მეოტე ტურში მათ კანდიდატს, დავით ბაქრაძეს.

ბოკერიას თქმით, პარტიებს შორის ფუნდამენტურ საკითხებზე განსხვავება ახლა უფრო მეტად საგრძნობია ვიდრე დაშლის დროს. მიუხედავად ამისა, მისი თქმით, ერთგული რჩებიან იმ შეთანხმების, რომელიც არჩევნებზე თავდაუსხმელობას და მეორე ტურში მხარდაჭერის ეხება. აქედან გამომდინარე, ბოკერიამ გაერთიანებული ოპოზიციისგან მოითხოვა კონკრეტული პასუხი მეორე ტურის შესახებ.

ბოკერიას კითხვას გაერთანებული ოპოზიციის წარმომადგენელმა, გიორგი ვაშაძემ უპასუხა რომელიც გრიგოლ ვაშაძის საპრეზიდენტო კამპანიას უძღვება. ვაშაძის მტკიცებით, სხვადასხვა კვლევით დასტურდება, რომ მათი კანდიდატი პირველივე ტურში გაიმარჯვებს.

"რაც შეეხება ჰიპოთეტურ დაშვებას, მეორე ტურში ევროპული საქართველოს კანდიდატის მხარდაჭერის თაობაზე, ვაცხადებთ, რომ დავუჭერთ მხარს და ველით იგივე, მკაფიო, ნათელ განცხადებას მათგან და სხვა ოპოზიციური პარტიებისგან", — განაცხადა ვაშაძემ.

ევროპულმა საქართველომ და ერთიანმა ნაციონალურმა მოძრაობამ საპრეზიდენტო არჩევნებისთვის სამპუნქტიან შეთანხმებას 11 ივლისს მოაწერეს ხელი. შეთანხმების თანახმად წინასაარჩევნო კამპანიის დროს პარტიებმა ერთმანეთზე შეტევისა და კრიტიკისგან თავი უნდა შეიკავონ და მეორე ტურში ერთმანეთის კანდიდატს დაუჭირონ მხარი.

შეთანხმება დადებიდან 19 დღეში დაარღვია გრიგოლ ვაშაძემ და ევროპული საქართველო წინა არჩევნებზე შედეგების გაყალბებაში დააადანაშაულა. 23 ოქტომბერს ვაშაძე გააკრიტიკა ევროპული საქართველოს ლიდერმა, გიგი უგულავამ.