თურქეთის პრეზიდენტმა, რეჯეპ ტაიპ ერდოღანმა განაცხადა, რომ არაბი ჟურნალისტის, ჯამალ ხაშოგის მკვლელობა საუდის არაბეთმა წინასწარ დაგეგმა, წერს The Guardian.

ერდოღანის განმარტებით, ხაშოგის მკვლელობა სტამბოლის საკონსულოში ვიზიტამდე რამდენიმე დღით ადრე დაიგეგმა. მისივე თქმით, მკვლელობაში საუდის არაბეთიდან ორი ჯგუფი მონაწილეობდა, რომელთაგან ერთ-ერთში გენერლები იყვნენ.

ჟურნალისტი ჯამალ ხაშოგი 2 ოქტომბერს სტამბოლში საუდის არაბეთის საკონსულოში შევიდა და მას შემდეგ აღარავის უნახავს. თურქეთის ოფიციალური პირები თავიდანვე ამბობდნენ, რომ ჟურნალისტი საკონსულოში მოკლეს და ამაში საუდის არაბეთის ხელი ერია, თუმცა ეს უკანასკნელი ამას კატეგორიულად უარყოფდა.

საბოლოოდ კი საუდის არაბეთმა 20 ოქტომბერს აღიარა, რომ ჯამალ ხაშოგი საკონსულოში ჩხუბის დროს გარდაიცვალა. ამ საქმესთან დაკავშირებით გაათავისუფლეს დაზვერვის სამსახურის უფროსის მოადგილე და პრინც მუჰამედ იბნ სალმანის უფროსი თანაშემწე. გარდა ამისა, გამოძიების ფარგლებში 18 პირი დააკავეს. ჟურნალისტის ცხედარი ამ დრომდე ნაპოვნი არ არის.