არაბი ჟურნალისტის, ჯამალ ხაშოგის გაქრობის გამო აშშ-ს ფინანსთა მინისტრი, სტივენ მნუჩი და დიდი ბრიტანეთის საერთაშორისო ვაჭრობის მინისტრი, ლიამ ფოქსი საუდის არაბეთში ინვესტორების საერთაშორისო სამიტს არ დაესწრებიან. კონფერენცია 23-25 ოქტომბერს არის დაგეგმილი და მისი ინიციატორი საუდის არაბეთის პრინცი მუჰამედ ბინ სალმანია.

მიმდინარე წლის 2 ოქტომბერს ხაშოგი, რომელიც საუდის არაბეთსა და ტახტის მემკვიდრე პრინცს ღიად აკრიტიკებდა, თურქეთში საუდის არაბეთის საკონსულოში შევიდა და გაქრა. ხაშოგი საკონსულოში ქორწინებისთვის საჭირო დოკუმენტებისთვის შევიდა.

თურქეთის პოლიცია ამტკიცებს, რომ ჟურნალისტი მოკლეს. საუდის არაბეთის ხელისუფლება ჟურნალისტის გაქრობაში მონაწილეობას უარყოფს და პირობას იძლევა, რომ დეტალურ გამოძიებას ჩაატარებს.

2016 წელს საუდის არაბეთმა აშშ-ის პრეზიდენტის, დონალდ ტრამპის კრიტიკის გამო ხაშოგის ჟურნალისტური საქმიანობა აუკრძალა, რის გამოც მას აშშ-ში გადასახლება მოუწია. ამერიკაში ის Washington Post-ის მესვეტე გახდა.

საუდის არაბეთი ამტკიცებს, რომ საკონსულო მომსახურების შემდეგ ხაშოგიმ შენობა დატოვა, თუმცა თურქეთის პოლიცია ამტკიცებს, რომ ის კონსულის რეზიდენციაში გადაიყვანეს და მოკლეს.

ამის ფონზე საერთაშორისო სამიტში მონაწილეობაზე უარი უკვე თქვეს ისეთმა კომპანიებმა როგორიცაა: HSBC, Credit Suisse, MasterCard, Ford, Uber, Google და სხა. რამდენიმე მედიაკომპანიამ კი თავისი ჟურნალისტები გაიწვია, მათ შორის, New York Times-მა, Bloomberმა და CNN-მა.