"გვეძახდნენ, რომ მირზა სუბელიანს ვერ დავიჭერდით, მაგრამ სუბელიანი დღეს არის პატიმარი", — ასე გამოეხმაურა შინაგან საქმეთა მინისტრი გიორგი გახარია "მირზა სუბელიანის ფარულ ჩანაწერებს", სადაც ის, სავარაუდოდ, ხელისუფლებასთან გარიგებაზე საუბრობს.

გიორგი გახარია ამბობს, რომ მისი ბრალეულობა ხორავას ქუჩის საქმეზე ბოლო სასამართლო სხდომაზე გამოიკვეთა. გახარიას თქმით, "სუბელიანი იმდენ ხანს იჯდება ციხეში, რამდენსაც ქართული სასამართლო გადაწყვეტს".

რუსთავი 2-ის მიერ გავრცელებული ჩანაწერების მიხედვით, სუბელიანი ამბობს, რომ მას წინასწარ აქვს შეთანხმებული ხელისუფლებასთან, როდის უნდა დადგეს მისი განაჩენი და რამდენი ხნით უნდა იჯდეს ციხეში.

ფარულ აუდიჩანაწერში საუბარია ასევე გახმაურებული საქმეების გახსნის ძალადობრივ მეთოდებზე, ხელისუფლების კომპრომატებზე და სავარაუდოდ, ყოფილი პრემიერის, ვანო მერაბიშვილის ციხიდან გაყვანის ეპიზოდზე. ჩანაწერში სუბელიანი, სავარაუდოდ, ქართული ოცნების დეპუტატ ვიქტორ ჯაფარიძეს და ლტოლვილთა სამინისტროს ყოფილ მაღალჩინოსან, გენერალური ინსპექციის ყოფილ თანამშრომელ, დათო ცუხიშვილს ესაუბრება. ჩანაწერის ავთენტურობა ჯერ დადგენილი არ არის.