ნინო ბურჯანაძის ინიციატივაზე, უბლოკო სტატუსის შესახებ, პარლამენტის საპროცედურო საკითხთა კომიტეტი უახლოეს სხდომაზე იმსჯელებს. დარეგისტრირების შემთხვევაში, საინიციატივო ჯგუფმა უნდა შეაგროვოს 200 000 ამომრჩევლის ხელმოწერა. ამის შესახებ დღევანდელ ბიუროს სხდომაზე გახდა ცნობილი.

ბიუროს დასრულების შემდეგ, პარლამენტის თავმჯდომარემ დავით უსუფაშვილმა ჟურნალისტებთან თავისი საკონსტიტუციო ინიციატივის მიზეზებზე ისაუბრა და იმ პოლიტიკოსებს უპასუხა, რომლებმაც განაცხადეს რომ ესაა რესპუბლიკელების პიარ ნაბიჯი:

"ეს არის პოლიტიკური ინიციატივა და მე მაოგნებს განცხადებები იმის შესახებ, რომ საარჩევნო კამპანიაა და უსუფაშვილი ამიტომ გამოვიდა ინიციატივითო. მე ვაცხადებ რომ ეს არის საარჩევნო კამპანიური ინიციატივა და ამ ინიციატივით მინდა რომ ჩვენ ყველამ ქართველ ხალხს ვუთხრათ, ამ კონკრეტულ საკითხში რა პოზიცია გვაქვს. მე ამდენი მაინც ვიცი საპარლამენტო საქმიანობის, რომ ეს პარლამენტი ამ დოკუმენტს ვერ განიხილავს, ვერ მოვასწრებთ ჩვენ ვერც კომისიის შექმნას და ვერც ვერაფერს. მივმართავ ყველა პოლიტიკურ ძალას რომ საკითხის არსთან დაკავშირებით გააკეთონ მკაფიო განაცხადი ".

დავით უსუფაშვილმა განაცხადა რომ ფრაქციის წევრებს დაურიგდათ სპეციალური ბლანკი და მათ ექნებათ გარკვეული ვადა, რომ დააფიქსირონ საკუთარი პოზიცია.

ნინო ბურჯანაძის ინიციატივით, საქართველოს კონსტიტუციაში უბლოკო სტატუსის ჩანაწერი უნდა შევიდეს. როგორც უსუფაშვილი განმარტავს, ინიციატორები აპირებენ შეაგროვონ ხელმოწერები და საქართველოს კონსტიტუციაში მოითხოვონ უბლოკო სტატუსის ჩაწერა, ანუ კონსტიტუციურად აუკრძალონ საქართველოს ევროპული და ევროატლანტიკური ინტეგრაცია.

12 აგვისტოს, ამის საპასუხოდ დავით უსუფაშვილმა განცხადება გააკეთა და პარლამენტში საკონსტიტუციო ცვლილების შეტანის ინიციატივა გააჟღერა, რომელიც ქვეყნის სწრაფვას განსაზღვრავს ევროატლანტიკური სტრუქტურებისკენ.