საქართველოს პარლამენტის თავმჯდომარისა და ქართული ოცნების ლიდერის, ირაკლი კობახიძის თქმით, ტელეკომპანია რუსთავი 2 "ტვინის გამორეცხვის" კამპანიას ატარებს. ასე გამოეხმაურა კობახიძე არხის მიერ ხორავას ქუჩის დანაშაულის შეუტყობინებლობისთვის ბრალდებულის, მირზა სუბელიანის სავარაუდო ჩანაწერების გავრცელებას.

"პარტიულ ტელევიზიას, რუსთავი 2-ს სინამდვილის დამახინჯების, მოქალაქეზე ზეწოლისა და მაყურებლის მძევლად აყვანის ერთგვარი მცდელობა. კერძოდ, რუსთავი 2 აწარმოებს რუსული სტილის ტვინის გამორეცხვის პოლიტიკას, რომელიც ზუსტად შეესატყვისება რუსული არხების "საუკეთესო პრაქტიკას", — განაცხადა კობახიძემ.

კობახიძის თქმით, მედიამონიტორინგს ატარებენ და რუსთავი 2-ის მონაცემებს საერთაშორისო პარტნიორებს გააცნობენ.

ირაკლი კობახიძის რუსთავი 2-ის მიმართ კრიტიკულ განცხადებას წინ უსწრებდა პროკურატურის საგანგებო ბრიფინგი, სადაც, სავარაუდოდ, მირზა სუბელიანის აუდიოჩანაწერის კიდევ ერთი ფრაგმენტი გასაჯაროვდა. ამ აუდიოჩანაწერის მიხედვით პროკურატურა მუშაობს ვერსიაზე, რომლის მიხედვითაც მირზა სუბელიანი აპირებს ხელისუფლების წინააღმდეგ მტკიცებულებებთან დაკავშირებით ცრუ ინფორმაცია გაავრცელოს. რუსთავი 2-ის აუდიოჩანაწერით კი ირკვეოდა, რომ მას ხელისუფლების წინააღმდეგ მტკიცებულებები აქვს.