"მიხაელ შუმახერის მდგომარეობა მკურნალობის შედეგად უმჯობესდება და ის ამ მძიმე სიტუაციიდან აუცილებლად გამოვა" - აცხადებს იტალიელი ბიზნესმენი და ფერარის ყოფილი შეფი ლუკა კორდერო დი მონტეცემოლო. ინფორმაციას ტელეგრაფი ავრცელებს.

Formula 1-ის შვიდგზის ჩემპიონის მდგომარეობის გაუარესების შესახებ, თვეების წინ, ინფორმაცია ვრცელდებოდა. მონტეცემოლო ერთ-ერთი იყო, რომელმაც 2016 წლის თებერვალში განაცხადა, რომ შუმახერის ჯანმრთელობის მდგომარეობა "არ იყო კარგი".

ორშაბათს, მან Ecumenical News-ს უთხრა, რომ სიამოვნებით გაამხელდა კარგ სიახლეს:

"სიხარულით გეტყვით, რომ ის რეაგირებს. ვიცი როგორი ძლიერია და დარწმუნებული ვარ, რომ მის შეუპოვრობას უნდა ვუმადლოდეთ, რაც გადამწყვეტია ამ ბრძოლაში. ის აუცილებლად დააღწევს თავს ამ ძალიან, ძალიან რთულ სიტუაციას".

2013 წელს თხილამურების სრიალის დროს დაშავებული გერმანელი მრბოლელის ჯანმრთელობის შესახებ ინფორმაცია დიდი სიხშირით არ ვრცელდება.

შუმახერი 2013 წლის 29 დეკემბერს ალპებში თხილამურებით სრიალის დროს კლდეს დაეჯახა. მიუხედავად იმისა, რომ ის ჩაფხუტს ატარებდა, შუმახერმა თავის ტვინი დაიზიანა და 6 თვე კომაში გაატარა.

2014 წლის 16 ივნისს მიხაელ შუმახერი კომიდან გამოვიდა, 9 სექტემბერს კი კლინიკა დატოვა და ამ დრომდე მკურნალობისა და რეაბილიტაციის პროცესს სახლში გადის.

მრბოლელის მდგომარეობასთან დაკავშირებით უამრავი სპეკულაცია ვრცელდებოდა. მისი მენეჯერი რეგულარულად ასწორებს მედიაში გავრცელებულ ცნობებს შუმახერის ჯანმრთელობის მდგომარეობასთან დაკავშირებით. 2015 წლის დეკემბერში მან უარყო ინფორმაცია, რომ ფორმულა 1-ის ლეგენდამ სიარული შეძლო და გამოცემა Bunte "საშობაოდ ყალბი იმედების გავრცელებაში" დაადანაშაულა.

ბოლო ცნობების მიხედვით, მიხაელ შუმახერი პარალიზებულია და ეტლსაა მიჯაჭვული, მას მეხსიერების პრობლემები აქვს და ლაპარაკი არ შეუძლია.

მისი მეგობარი და FIA-ს პრეზიდენტი ჯინ ტოდტი აცხადებს, რომ შუმახერი ბრძოლას განაგრძობს.