ნიკა გვარამიას ფეისბუქსტატუსის გამო, არასამთავრობო ორგანიზაციებს ქართული ოცნების დეპუტატი არჩილ თალაკვაძეც აკრიტიკებს. თალაკვაძემ ტვ იმედის ეთერში საუბრისას თქვა, რომ ორგანიზაციები ერთიანი ნაციონალური მოძრაობის დღის წესრიგით მუშაობენ:

"შემომწირველებზე მიმდინარეობს ფსიქოლოგიური ზეწოლა და მედიის მეშვეობით აიძულებენ მათ, რომ ასეთი ნაბიჯი აღარ გადადგან. მესამე სექტორი, არასამთავრობო ორგანიზაციები, ასეთ ფაქტებს ტოვებენ რეაგირების გარეშე. დღის წესრიგი დღეს არის იგივე, რაც ნაციონალური მოძრაობისა და მიხეილ სააკაშვილის. როგორც მინიმუმ, როდესაც მიხეილ სააკაშვილი აქებს არასამთავრობოებს, ე.ი. რაღაცას არასწორად აკეთებენ ეს ადამიანები".

თალაკვაძის თქმით, როდესაც ტელევიზიის დირექტორი საარჩევნო სუბიექტს ღიად ემუქრება ვფიქრობ სადამკვირვებლო ორგანიზაციებს უნდა ამოეღოთ ხმა:

"დემოკრატიასთან შეუთავსებელია, როდესაც ტელევიზიის დირექტორი, რომელიც მაუწყებლობს მთელი ქვეყნის მასშტაბით, მოუწოდებს კონკრეტული სუბიექტების თუ ადამიანების შევიწროებისკენ, დევნისკენ".

მანამდე, 8 ოქტომბერს გამართული საგანგებო ბრიფინგი პარლამენტის თავმჯდომარემ ირაკლი კობახიძემ ნიკა გვარამიას ფეისბუქსტატუსს დაუთმო და მას "ხელმოცარული" და "უნიათო ფაშისტი" უწოდა.

ქართული ოცნების ლიდერმა არასამთავრობო ორგანიზაციებიც გააკრიტიკა იმის გამო, რომ ნიკა გვარამიას "ფაშისტური განცხადება" არ შეაფასეს:

"მეტიც, ერთ-ერთმა მათგანმა, მიხეილ ბენიძემ ნიკა გვარამიას დაცვაც კი იკადრა (ანუ უკადრებელი იკადრა), რაც უკიდურესად შემაშფოთებელია".

5 ოქტომბერს ნიკა გვარამიამ ფეისბუქის საკუთარ გვერდზე გამოაქვეყნა განცხადება, სადაც ის წერს, რომ ყველა, ვინც სალომე ზურაბიშვილს ან აფინანსებს, ან კამპანიაში სხვაგვარად ეხმარება, უნდა შევიწროვდეს.

"ყველა ეს ადამიანი უნდა დავიმახსოვროთ და გვახსოვდეს, რომ მოღალატის გვერდში მდგომი ხალხია, და მათგან ყველაფერს უნდა ელოდოს ჩვენი სამშობლო. უნდა დავიმახსოვროთ, და გავაძევოთ საზოგადოებრივი ცხოვრების ყველა სფეროდან, იქნება ეს ბიზნესი, კულტურა თუ პოლიტიკა. ქვეყნის მოღალატე და მისი მოკავშირეები საჩვენებლად უნდა დაისაჯონ! მე, პირადად, ვაპირებ ამას მივუძღვნა საკუთარი თავი უახლოესი რამდენიმე წელი. ჯერ არჩევნების წაგებაში ძალიან დავეხმარები მოღალატე სალომეს (აუცილებლად წააგებს) და მერე მივუბრუნდები მის დამხმარეებს", — წერს ნიკა გვარამია.