გუშინ, 7 ოქტომბერს სოფელ ახალსოფელში ერთი პირი გარდაიცვალა. როგორც ადგილობრივები რუსთავი 2-თან საუბრისას აცხადებენ, გარდაცვლილი პოლიციამ ალკოტესტის ჩატარების მიზნით გააჩერა, რა დროსაც ის შეუძლოდ იყო. მათივე თქმით, აღნიშნულმა პირმა პატრულის თანამშრომლებს უთხრა, რომ ცუდად იყო და წამლის დასალევად გაეშვათ, რაც სამართალდამცველებმა არ გაითვალისწინეს და დამხმარე ეკიპაჟი გამოიძახეს. ადგილობრივების ინფორმაციით, ამასობაში მოქალაქეს გული წაუვიდა და გარდაიცვალა.

შემთხვევას შინაგან საქმეთა სამინისტრო დღეს, 8 ოქტომბერს გამოეხმაურა. ისინი აცხადებენ, რომ საქმეზე დაწყებულია გამოძიება და საგამოძიებო მოქმედებების დასრულებამდე პატრულ-ინსპექტორებს სამსახურებრივი უფლებამოსილება შეუჩერდათ.

რაც შეეხება მომხდარს, შსს-ს განცხადებით, პირველადი შედეგებით ირკვევა, რომ საპატრულო პოლიციის ეკიპაჟის თანამშრომლებმა გარდაცვლილს მანქანის გაჩერება სიმთვრალე-სიფხიზლეზე გადამოწმების მიზნით მოსთხოვეს. უწყების ვერსიით, არაერთი გაფრთხილების მიუხედავად მოქალაქემ შემოწმებაზე უარი თქვა, ავტომანქანა საკუთარი სახლის ეზოში შეიყვანა, პოლიციის თანამშრომლებთან დაბრუნდა და ამის შემდეგ მისცა მათ საშუალება, ჩაეტარებინათ ტესტი.

შსს-ს ინფორმაციით, გარდაცვლილს ალკოჰოლური თრობა არ დაუდგინდა, რის შემდეგაც ეკიპაჟმა დატოვა ტერიტორია, მოქალაქე კი სახლთან დარჩა. მათივე ცნობით, დაახლოებით ნახევარი საათის შემდეგ მოქალაქეებმა პატრულს მიმართეს, ადგილზე მისვლისას კი მოქალაქე უგონო მდგომარეობაში დახვდათ. როგორც განცხადებაში ვკითხულობთ, პოლიციამ სასწრაფო დახმარების ეკიპაჟი გამოიძახა, აღნიშნული პირი კი საავადმყოფოში გადაყვანის შემდეგ გარდაიცვალა.