15 ივლისს მომხდარი სახელმწიფო გადატრიალების წარუმატებელი მცდელობის შემდეგ, თურქეთის ხელისუფლებამ სტამბოლში, 44 კომპანიაში ერთდროული რეიდები ჩაატარა. ამასთან, სხვადასხვა კომპანიის 120 ხელმძღვანელზე დაკავების ორდერიც იყო გაცემული. ინფორმაციას Reuters ადგილობრივ გამოცემა Anadolu-ზე დაყრდნობით ავრცელებს.

როგორც ცნობილია, აღნიშნულ პირებს ბრალად თურქეთის ხელისუფლების წინააღმდეგ მოქმედება და ამერიკაში მცხოვრებ სასულიერო პირთან, ფეტულა გიულენთან კავშირი ედებათ. ადგილობრივი საგამოძიებო უწყება აღნიშნულ კომპანიებს ფეტულა გიულენის მოძრაობის დაფინანსებაში ადანაშაულებს. თუმცა, ამ დროისთვის ინფორმაცია იმის შესახებ, კონკრეტულად რომელ კომპანიებზეა საუბარი, არ ვრცელდება.

15 აგვისტოს სამართალდამცავებმა ასევე რეიდი ჩაატარეს თურქეთის 3 სასამართლოში, რის შედეგადაც ათეულობით პირი დააკავეს.

15 ივლისს მომხდარი ამბოხის შემდეგ, 35 ათასზე მეტი პირია დაკავებული. გარდა ამისა, თანამდებობიდან გაუშვეს ათასობით სამხედრო და სახელმწიფო მოხელე. ქვეყანაში სამთვიანი საგანგებო მდგომარეობაა გამოცხადებული.

უფრო მეტი იხილეთ აქ: