იუსტიციის მინისტრმა თეა წულუკიანმა მსჯავრდებულ ვანო მერაბიშვილის ჯანმრთელობის მდგომარეობაზე ჟურნალისტებთან ისაუბრა და თქვა, რომ ის მერაბიშვილს მხოლოდ ჯანმრთელობას უსურვებს.

"სახეზე, იმის საპირისპიროდ რასაც აცხადებნენ ადვოკატები, არ არის დამბლა, სიმსივნური პროცესები გამორიცხულია. მინდა, პირველ რიგში, მშობლებს, ოჯახს მივულოცო რომ მსჯავრდებული იმ სიმპტომების ნაწილში, რაც მას აწუხებს, ეს არის სუნთქვითი პრობლება, ქუთუთოს ანთება და სხვა გაუმჯობესების და გამოჯანმრთელების გზაზეა. პატიმარს, როგორც კი გაუჩნდება პატარა პრობლემა, ჩვენ რა თქმა უნდა ყველაფერს გავაკეთებთ".

ვანო მერაბიშვილი კლინიკა მედიკლაბიდან დღეს დილით გაწერეს და მატროსოვის ციხეში დააბრუნეს. გუშინ კონსილიუმის შეკრების შემდეგ, მერაბიშვილის ადვოკატმა, გიორგი ჩივიაშვილმა ჟურნალისტებს განუცხადა, რომ ექიმები ჰორნერის სინდრომის (ნერვული გზების დაზიანება) დიაგნოზზე შეჯერდნენ. თუმცა, მისივე თქმით, რით არის ეს გამოწვეული ეს დაავადება, ამასთან დაკავშირებით საუბარი უჭირთ.

პენიტენციური სამსახურის ცნობით, ვანო მერაბიშვილი კლინიკა მედიკლაბში სისხლის დამატებითი ანალიზების ასაღებად 2 ოქტომბერს გადაიყვანეს.