საქართველოს ყოფილი პრემიერის ვანო მერაბიშვილის ადვოკატმა, გიორგი ჩივიაშვილმა კლინიკა მედიკლაბ ჯორჯიაში კონსილიუმის შეკრების შედეგებზე ჟურნალისტებთან ისაუბრა და თქვა, რომ ექიმებმა ჰორნერის სინდრომი (ნერვული გზების დაზიანება) დაადგინეს, თუმცა გამომწვევი მიზეზები — ვერ. მისივე თქმით, ექიმები ვერც მკურნალობის მეთოდებზე საუბრობენ:

"ყველა ექიმი შეჯერდა იმაზე, რომ ეს არის ჰორნერის სინდრომი. რით არის ეს გამოწვეული, ამასთან დაკავშირებით საუბარი უჭირთ. იქ იყო რაღაც განსხვავებული აზრები, რაზეც ახლა მიმდინარეობს მათი მოსაზრებების დაფიქსირება. როდესაც გადმოგვცემენ ამ დოკუმენტს, უფრო მეტი გვეცოდინება. დაზუსტებით შემიძლია გითხრათ, რომ როდესაც მათ გასინჯეს ვანო მერაბიშვილი, პრაქტიკულად უთხრეს ის, რომ სახეზე არსებული ნაკლი - ჩავარდნილი თვალი შეიძლება ასე დარჩეს, შეიძლება გაუმჯობესდეს ან არც გაუმჯობესდეს. მკურნალობასთან დაკავშირებით მე რაც მოვისმინე, მათი უმეტესობა ამბობდა, რომ ამ მომენტისთვის მკურნალობას ვერ დაუნიშნავენ იმიტომ, რომ ამის საჭიროებას ვერ ხედავენ".

პენიტენციური სამსახურის ცნობით, ვანო მერაბიშვილი კლინიკა მედიკლაბში სისხლის დამატებითი ანალიზების ასაღებად გუშინ 2 ოქტომბერს გადაიყვანეს, რათა ადვოკატების მიერ გამოთქმული ეჭვი გამოერიცხათ. მათივე თქმით, ყოფილი მინისტრის ჯანმრთელობის მდგომარეობა დამაკმაყოფილებელია.

პენიტენციური სამსახურის ინფორმაციით 26 სექტემბერს კლინიკა ავერსში ჩატარებული გამოკვლევებით, მკურნალობის შედეგად, ჰორნერის სინდრომის დაავადება რეგრესირებს.