ძალა ერთობაშიას შეხვედრაზე თბილისელებთან შვილმოკლული მამები, მალხაზ მაჩალიკაშვილი და ზაზა სარალიძეც მივიდნენ. მათ პარტიის მხარდამჭერებს სიტყვით მიმართეს.

"იმის მაგივრად, რომ ხელისუფლების წარმომადგენლები გვისამძიმრებდნენ, პირიქით, წიხლს გვაჭერენ, გვდევნიან და ტერორისტებად გვრაცხავენ. იმიტომ, რომ ყველას ფული აქვს აღებული, მათ ივაჭრეს ჩვენი შვილების სულებით", - განაცხადა სარალიძემ სიტყვით გამოსვლისას.

სიტვყვის დასრულების შემდეგ სარალიძემ აღნიშნა, რომ "ძალა ნამდვილად ერთობაშია" და მხარდაჭერებს მოუწოდა, პარლამენტთან მათ აქციას შეუერთდნენ.

ხორავას ქუჩაზე მოკლული არასრულწლოვნის, დავით სარალიძის მამამ, ზაზა სარალიძემ 27 სექტემბერს რუსთაველის გამზირზე გამართულ აქციაზე განაცხადა, რომ ის და მალხაზ მაჩალიკაშვილი კონკრეტულ თემებზე პოლიტიკურ პარტიებთან კონსულტაციებს გადიან. მისი თქმით, კონსულტაციების დასრულების შემდეგ ისინი ერთიან სამოქმედო გეგმას დასახავენ.

ზაზა სარალიძემ და მალხაზ მაჩალიკაშვილმა პარლამენტის შენობის წინ აქცია #მამებისიმართლისთვის 10 სექტემბრიდან განაახლეს. ზაზა სარალიძე ითხოვს მისი შვილის მკვლელისა და იმ ადამიანების დასჯას, ვინც მკვლელს ხელს აფარებდა, მალხაზ მაჩალიკაშვილის მოთხოვნა კი სპეცოპერაციის შედეგად დაღუპული შვილის საქმის გამოძიებაა.