ქურდული სამყაროს წევრობის, ქურდულ შეკრებაში მონაწილეობისა და ქურდული სამყაროს მხარდაჭერის ბრალდებით 6 პირი დააკავეს. ამის შესახებ ინფორმაციას შინაგან საქმეთა სამინისტრო ავრცელებს. შსს-ს ცნობით, ბრალდებულები თბილისში, ქუთაისსა და წალკაში დააკავეს.

უწყების განმარტებით, თურქეთში, ქართველმა "კანონიერმა ქურდებმა" მინდია გორაძემ (ლავას ოღლი) და ჯეირან კინწურაშვილმა ერთ-ერთ ბრალდებულს მ.დ-ს ე.წ. მაყურებლის სტატუსი მიანიჭეს და მას წალკის მუნიციპალიტეტის სოფლებში "ქურდული საერთოს" შეკრების ორგანიზება დაავალეს.

შსს-ს განცხადებით, ბრალდებულებმა შეკრებაზე დაადგინეს, რომ წალკის რაიონის მაცხოვრებლებს "ქურდული საერთოსთვის" შესატანი თანხა ყოველი თვის 10 რიცხვში უნდა გადაეხადათ, ხოლო ვისაც ხელფასი ბანკში ერიცხებოდა, შესატანს ჩარიცხვის მეორე დღეს გაიღებდა.

უწყებაში ამბობენ, "ქურდული საერთოსთვის" წალკის მაცხოვრებლებმა გარკვეული თანხა შეაგროვეს, რომლის ნახევარიც "კანონიერი ქურდის", ჯეირან კინწურაშილის გადაწყვეტილებით საფრანგეთში მყოფი "კანონიერი ქურდის", გიორგი ფოლადაშვილის (სინკარა) დედას გადაერიცხა.

შსს-ს ცნობით, დაკავებულების საცხოვრებელი ბინების ჩხრეკისას ნივთმტკიცებად ამოიღეს ე.წ. ქურდული საერთოს სია და მობილურები, რომლითაც ისინი ერთმანეთს და საზღვარგარეთ მყოფ ქართველ "კანონიერ ქურდებს" უკავშირდებოდნენ.

უწყების მიერ გავრცელებულ განცხადებაში წერია, რომ საქმეზე გამოძიება საქართველოს სისხლის სამართლის კოდექსის 223-ე პირველი პრიმა მუხლის პირველი ნაწილით, 223-ე მე-2 პრიმა მუხლით და 223-ე მე-3 პრიმა მუხლის მე-2 ნაწილით მიმდინარეობს.