პარლამენტის თავმჯდომარის, ირაკლი კობახიძის განცხადებით, გუნდში აქვთ კვლევა, რომლის მიხედვითაც, საპრეზიდენტო არჩევნების პირველივე ტურში, გუნდის მიერ მხარდაჭერილი კანდიდატი, სალომე ზურაბიშვილი გაიმარჯვებს.

კობახიძის განცხადებითვე, გუნდის მთავარი ამოცანაა, რომ ნაციონალური მოძრაობის და ევროპული საქართველოს საპრეზიდენტო კანდიდატებმა არჩევნებში ხმების 27%-ზე მეტი ვერ მიიღონ, რადგან ენმ-მ 2008 წელს რუსეთს საქართველოს "ორი ისტორიული რეგიონი ჩააბარა".

გარდა ამისა, კობახიძე ედისონ რისერჩის კვლევასაც გამოეხმაურა, რომელიც რუსთავი 2-ის დაკვეთით ჩატარდა. მისი თქმით, ეს კვლევა ნაციონალური მოძრაობის დაკვეთით არის ჩატარებული.

"ნაციონალური მოძრაობა რომ აქვეყნებს თავის კვლევებს, მათ აქვთ, არ ვიცი, ალბათ რაღაც იაფფასიანი გათვლა, რომ შეიძლება ამან რაიმე გავლენა მოახდინოს საზოგადოებაზე. ბუნებრივია,ყველამ იცის, რომ ნაციონალური მოძრაობის“ კვლევა, ეს არის, ნაციონალური მოძრაობის კვლევა", — ამბობს კობახიძე.