მიხეილ სააკაშვილი ფეისბუკის საშუალებით მორიგ ვიდეო-მიმართვას ავრცელებს, ამჯერად კახეთის მოსახლეობის მიმართ.

"კახეთი არის საქართველოს ერთ-ერთი მთავარი დასაყრდენი. საქართველოსთვის უზარმაზარი მნიშვნელობისა და პოტენციალის მქონე თავისი განსაკუთრებული საზოგადოებით".

სააკაშვილი მიმართვაში ტურიზმის მნიშვნელობაზე საუბრობს:

"ჩვენ ვაქციეთ კახეთი ტურიზმის ცენტრად. რამდენი ახალი ადგილი აშენდა. ეს ყველაფერი თქვენი მეშვეობით გაკეთდა, თქვენი ხელშეწყობით, თქვენი მონაწილეობით, იმიტომ რომ სხვანაირად ამას ვერ გავაკეთებდით".

მიხეილ სააკაშვილმა გაიხსენა რუსეთის ემბარგო: "თავის დროზე ამან ძალიან დაგვარტყა". ექსპრეზიდენტის თქმით, სწორედ მაშინ შეიძინა ყვარელში პატარა ვენახი, მოიწვია იქ მედიის წარმომადგენლები და ოფიციალური პირები უცხოეთიდან, რათა ქართული ღვინისთვის, სამზარეულოსა და კულტურისთვის რეკლამა გაეკეთებინა.

"სწორედ ამისი დამსახურებაა, რომ დღეს ქართული ღვინო გადის მთელს მსოფლიოში".

სააკაშვილის თქმით, პრობლემები არსებობს, რადგან საქართველოში ტურისტების რაოდენობა იზრდება, თუმცა სიღნაღში სულ უფრო და უფრო ცოტა ტურისტი ჩადის.

"თქვენ ცხოვრობთ პოტენციურად ძალიან მდიდარ რეგიონში, ამიტომ სიტყვა გაჭირვება ერთხელ და სამუდამოდ უნდა დარჩეს წარსულში".