ლგბტ თემის უფლებების შესასწავლად 25 სექტემბრიდან 5 ოქტომბრამდე საქართველოს გაეროს დამოუკიდებელი ექსპერტი ვიქტორ მადრიგალ-ბორლოზი ეწვევა. ინფორმაციას გაეროს თბილისის ოფისის ავრცელებს.

ვიქტორ მადრიგალ-ბორლოზი გაეროს ექსპერტად სექსუალური ორიენტაციის და გენდერული იდენტობის საფუძველზე ძალადობის და დისკრიმინაციისაგან დაცვის საკითხებზე 2018 წლის 1 იანვარს სამი წლის ვადით დაინიშნა .

"ვიზიტი იძლევა მნიშვნელოვან შესაძლებლობას, შეფასდეს ადამიანის უფლებათა ეროვნული და საერთაშორისო სტანდარტების იმპლემენტაცია, რომელთა მიზანია ძალადობისა და დისკრიმინაციის აღმოფხვრა ლესბოსელი, გეი, ბისექსუალი და ტრასნგენდერი (ლგბტ) პირების მიმართ ქვეყანაში", - მადრიგალ-ბორლოზის განცხადებას გაერო ავრცელებს.

ადამიანის უფლებათა ექსპერტი ეწვევა თბილისს, ქუთაისსა და ბათუმს, სადაც გამართავს შეხვედრებს აღმასრულებელი, საკანონმდებლო, სასამართლო და ადგილობრივი ხელისუფლების წარმომადგენლებთან. ის, ასევე, შეხვდება, სხვადასხვა რელიგიური კონფესიის წარმომადგენლებს, სახალხო დამცველის ოფისსა და იმ პირებს, რომლებიც მუშაობენ ლგბტ პირთა უფლებებზე. შეხვედრები, ასევე, გაიმართება საერთაშორისო ორგანიზაციების წარმომადგენლებთან.

"ჩემი ვიზიტისას, შეფასდება სექსუალური ორიენტაციისა და გენდერული იდენტობის საფუძველზე ძალადობისა და დისკრიმინაციის წინააღმდეგ ბრძოლის პროგრესი, მოხდება არსებული ხარვეზებისა და გამოწვევების ხაზგასმა და შესაბამის გადაწყვეტილების მიმღებ აქტორებს წარედგინებათ რეკომენდაციები", - განაცხადა ექსპერტმა.

მისივე თქმით, შეფასდება ის ფაქტორები, რომლებიც გავლენას ახდენს ლგბტ პირების მოწყვლადობასა და გარიყვაზე:

"შევისწავლი ძალადობისა და დისკრიმინაციის გამომწვევ მიზეზებს სოციალური ცრურწმენების ჩათვლით, და კავშირს სიძულვილის ენასა და სიძულვილის საფუძველზე ჩადენილ დანაშაულს შორის“.

ექსპერტი ვიზიტის საბოლოო ანგარიშს რეკომენდაციების ჩათვლით გაეროს ადამიანის უფლებათა საბჭოს 2019 წლის ივნისში წარუდგენს.