სპეციალური პენიტენციური სამსახური ყოფილი შინაგან საქმეთა მინისტრის, ვანო მერაბიშვილის ჯანმრთელობის მდგომარეობის გაუარესებასა და ინტოქსიკაციას უარყოფს. სამსახურის განმარტებით, მაღალი საზოგადოებრივი ინტერესიდან გამომდინარე მერაბიშვილის დიაგნოზს ასაჯაროებენ.

როგორც განცხადებაშია აღნიშნული, გამოკვლევების შედეგად მერაბიშვილს დაუდგინდა შემდეგი დიაგნოზი:

  • ვაზომოტორული რინიტი;
  • ჰორნერის სინდრომი (მარჯვნივ);
  • ბლეფარო-კონიუნქტივიტი.

პენიტენციური სამსახურის განმარტებით, მასთან შეთანხმებით შერჩეულ კლინიკაში მერაბიშვილი რამდენჯერმე გადაიყვანეს, სადაც გამოკვლევები ჩაუტარდა.

"კერძოდ: ოტო-რინო-ლარინგოლოგის, ოფთალმოლოგის, ნევროლოგის კონსულტაციები და შესაბამისი გამოკვლევები; მათ შორის, თავის ტვინის მაგნიტურ-რეზონანსული გამოკვლევა ანგიოგრაფიულ რეჟიმში, კისრისა და ხერხემლის სვეტის მაგნიტურ-რეზონანსული გამოკვლევა, გულ-მკერდის და დანამატი წიაღების რენტგენოგრაფია, რინოსკოპია, ოფთალმოსკოპია", - ნათქვამია განცხადებაში.

მათივე თქმით, დიაგნოზის დასმის შემდეგ მერაბიშვილს შესაბამისი მკურნალობა აქვს დანიშნული, პენიტენციური დაწესებულების მედპერსონალი უზრუნველყოფს.

შინაგან საქმეთა ყოფილი მინისტრის ვანო მერაბიშვილს, ვალერი გელაშვილის ცემის საქმეზე სასჯელის ზომად განესაზღვრა თავისუფლების აღკვეთა ექვსი წლისა და ცხრა თვის ვადით. ამავე დროს ჩამოერთვა, თანამდებობის დაკავების უფლება ორი წლითა და სამი თვით.