ქართული ოცნების ლიდერი, ირაკლი კობახიძე ამბობს, რომ თუ მარიხუანის კულტივირებაზე კანონის მიღებით ნარკოტიკული საშუალებების არალეგალურად მიმოქცევა წახალისდება, მაშინ კანონპროექტს გამოითხოვენ. შესაბამისი განცხადება მედიასაშუალებებთან კობახიძის პრესსამსახურმა დააგზავნა.

"სამწუხაროდ, საზოგადოების ვნებათაღელვით ბოროტად ისარგებლეს გარკვეულმა ძალებმა, რომელთა მთავარი ნიშან-თვისებები სწორედ ადამიანის ღირსების უგულვებელყოფა და მისი შელახვის მცდელობა, ქვეყანასთან, ხალხთან და საზოგადოებასთან დაპირისპირება, ეკლესიის წინააღმდეგ მიზანმიმართული ბრძოლა და რელიგიური გრძნობების შეურაცხყოფაა", — აღნიშნა კობახიძემ.

ის თანაგუნდელებსა და საზოგადოების სხვა წარმომადგენლებს მოუწოდებს საჯარო სივრცეებში თავი შეიკავონ ემოციური პოლემიკისგან.

"გამოვხატავთ უდიდეს პატივისცემას უწმინდესისა და უნეტარესის მიმართ, რომლის თითოეული ნაბიჯი და განცხადება განმსჭვალულია სიბრძნით და რომელიც ყოველთვის მიმართულია ჩვენი ქვეყნისა და საზოგადოების ინტერესების დაცვისკენ", — აღნიშნავს კობახიძე.