კოკა-კოლისა და ლაღიძის წყლის ფეისბუქგვერდებზე მოქალაქეთა ჯგუფმა ფლეშმობი დაიწყო. ფეისბუქგვერდებზე კომენტარებსა და შეფასებებში იდენტური შინაარსის ტექსტები: "რუსეთის გეგმის დამფინანსებელი! #რუსეთიოკუპანტია #არაოკუპაციას #Russiaisoccupant #Russiaisoccupier" იწერება.

ფლეშმობი მას შემდეგ დაიწყო, რაც კოკა-კოლა ბოთლერს ჯორჯიას დირექტორმა და ლაღიძის წყლის კაფე-ბარების ქსელის მფლობელმა, ვახტანგ ლაღიძემ პრეზიდენტობის კანდიდატს, სალომე ზურაბიშვილს 50 000 ლარი შესწირა. სალომე ზურაბიშვილი ფიქრობს, რომ 2008 წლის აგვისტოს ომი საქართველომ დაიწყო და მოქალაქეთა გაღიზიანებაც ამან გამოიწვია.

ვახტანგ ლაღიძემ On.ge-ს ჟურნალისტს არასწორი ინფორმაცია მიაწოდა და უთხრა, რომ ლაღიძის წყლების მფლობელთან მხოლოდ ნათესაური კავშირი ჰქონდა, არც მეწილე იყო და არც ხელმძღვანელი. საჯარო რეესტრში კომპანიის კიდევ ერთხელ გადამოწმების შემდეგ ლაღიძემ დაადასტურა, რომ On.ge-ს ჟურნალისტისთვის მის მიერ მიწოდებული ინფორმაცია არასწორი იყო.

2018 წლის არჩევნებისთვის საპრეზიდენტო კანდიდატების დაფინანსების შესახებ დეკლარაცია აუდიტის სამსახურმა გამოაქვეყნა. დეკლარაციები 22 აგვისტოდან 11 სექტემბრის ჩათვლისთ მდგომარეობას ეხება.

თითქმის ერთი თვის განმავლობაში ქართული ოცნების მიერ მხარდაჭერილმა საპრეზიდენტო კანდიდატმა, სალომე ზურაბიშვილმა 108 032 ლარის ოდენობის შემოწირულობა მიიღო. ამაში შედის 40 ათასი ლარი, რომელიც კანდიდატმა საკუთარ თავს შესწირა და ვახტანგ ლაღიძის 50 ათასლარიანი შემოწირულობა.