საქართველოს პრემიერ-მინისტრის, მამუკა ბახტაძის განცხადებით, განათლების ახალი რეფორმის ფარგლებში მასწავლებლების სახელფასო პოლიტიკა გადაიხედება. ამის შესახებ მამუკა ბახტაძემ იყალთოს აკადემიაში განათლების რეფორმის პრეზენტაციაზე განაცხადა.

პრემიერ-მინისტრის თქმით, 2018-2019 წლების განმავლობაში გაზრდილ ხელფასს მიიღებს 10 000 მასწავლებელი.

"2022 წლისთვის ჩვენი ამოცანაა დასაქმებული მასწავლებლის საშუალო ხელფასი გაზიარდოს სამჯერ", - განაცხადა პრემიერმა სიტყვით გამოსვლის დროს.

განათლების, კულტურის, სპორტისა და მეცნიერების მინისტრმა, მიხეილ ბატიაშვილმა მოგვიანებით დააკონკრეტა, რომ 2018-2019 სასწავლო წელს გაზრდილ ხელფასს მიიღებს 10 000-მდე მასწავლებელი, მათ შორის, სპეციალური მასწავლებელი; 2019-2021 წლებში ხელფასები გაეზრდებათ სკოლის დირექტორებს, ადმინისტრაციულ პერსონალს და გაგრძელდება ხელფასების ზრდა მასწავლებლებისთვის.

2022 წლისთვის კი მასწავლებლის საშუალო ხელფასი მიაღწევს 1 500 ლარს, ხოლო უმაღლესი საფეხურის მასწავლებლების ხელფასი - 2 000 ლარს და მეტს.

განათლების, კულტურის, სპორტისა და მეცნიერების მინისტრის, მიხეილ ბატიაშვილის განცხადებით, განათლების რეფორმა ხუთი მიმართულებით განხორციელდება. ეს მიმართულებებია:

  • სკოლამდელი განათლება;
  • ზოგადი განათლება;
  • უმაღლესი განათლება;
  • პროფესიული განათლება;
  • მეცნიერება და ინოვაციები.