თბილისის საქალაქო სასამართლომ წინასწარი შეცნობით, ტერორისტებისათვის და ტერორისტული ორგანიზაციისათვის მომსახურების გაწევის, ტერორისტებისათვის თავშესაფრის მიცემისა და რესურსებით უზრუნველყოფის ბრალდების საქმეზე ბრალდებულების ზ.გ.-სა და ბ.ჩ.-ს მიმართ გამამტყუნებელი განაჩენი გამოიტანა.

საქალაქო სასამართლოს ინფორმაცით, საქმე ეხება 2017 წლის 21 ნოემბერს, თბილისში ბერი გაბრიელ სალოსის ქუჩაზე მომხდარ ტერორისტულ აქტს, რა დროსაც ტერორისტული ორგანიზაციის წევრებმა ააფეთქეს ხელყუმბარები და ცეცხლსასროლი იარაღებიდან სამართალდამცავების მიმართ გახსნეს ინტენსიური ცეცხლი.

საქმის მასალების მიხედვით, საქართველოში უკანონოდ შემოსვლაში ბრალდებულები ტერორისტული ორგანიზაციის წევრს ა.ჩ.-ს დაეხმარნენ. ასევე, ბრალდებულები მათ სხვადასხვა სახის მომსახურებას უწევდნენ, კერძოდ, ამარაგებდნენ საკვები პროდუქტებით, ეხმარებოდნენ მობილური ტელეფონებისა და სხვადასხვა საყოფაცხოვრებო ნივთების შეძენაში.

სასამართლოს ცნობით, გამამტყუნებელი განაჩენის საფუძველზე ზ.გ.-ს 13 წლით თავისუფლების აღკვეთა განესაზღვრა. ხოლო ბ. ჩ.-ს აღიარებითი ჩვენების საფუძველზე, სასამართლომ დაამტკიცა მხარეებს შორის მიღწეული საპროცესო შეთანხმება, რომლის საფუძველზეც ბ. ჩ. ცნობილ იქნა დამნაშავედ და სასჯელის სახედ განესაზღვრა თავისუფლების აღკვეთა 8 წლის ვადით. ამ წლებიდან მსჯავრდებული 3 წელს მოიხდის პენიტენციურ დაწესებულებაში, ხოლო 5 წელი ჩაეთვალა პირობით, 6 წლის გამოსაცდელი ვადით.