ირანის რევოლუციურმა სასამართლომ ჟურნალისტ ისა საარხიზს სამწლიანი პატიმრობა მიუსაჯა. მას ბრალად მთავრობის წინააღმდეგ პროპაგანდის გაწევა და ქვეყნის ლიდერის შეურაცხყოფა ედება. ინფორმაციას გარდიანი ავრცელებს.

საარხიზი იგივე ბრალდებით ციხეში ხუთი წლით იჯდა და 2013 წელს გათავისუფლდა. ჟურნალისტი ოპოზიციურ მედიაგამომცემლობაში მუშაობდა, პირველ პატიმრობამდე კი ირანის კულტურის მინისტრის მოადგილის პოსტი ეკავა.

ამჯერად ოფიციალური პირები ზუსტად არ ასახელებენ, კონკრეტულად რა იყო ჟურნალისტის შეურაცხყოფის ბრალდებით დაკავების მიზეზი, თუმცა, მისი შვილი აცხადებს, რომ დაკავების მიზეზი წინასაარჩევნოდ რეპორტაჟებისა და ანალიზის მომზადება გახდა.

დაკავებულს ჯანმრთელობის სერიოზული პრობლემები აქვს. მას ცოტა ხნის წინ ჰქონდა გულის შეტევა და როგორც მისი შვილი აცხადებს, საარხიზს არტერიული წნევა და თირკმელები აწუხებს.

ჟურნალისტის საქმეზე სასამართლო მის ნოემბერში დაკავებიდან მიმდინარეობს. ის უკვე ორი თვეა შიმშილობს. როგორც ხელისუფლების წარმომადგენლები აცხადებენ, პატიმარს სამედიცინო ყურადღება არ აკლია.

ირანის პრეზიდენტ ჰასან რუჰანის ადმინისტრაცია პატიმრის მიმართ თანაგრძნობას გამოხატავს. აღსანიშნავია, რომ ისა საარხიზის დაკავებას წინ სამი ჟურნალისტის დაპატიმრება უძღოდა.