ტელეკომპანია იბერიამ დროებით მაუწყებლობა შეწყვიტა. საინფორმაციო სამსახურის უფროსმა, ვახო ხუზმიაშვილმა On.ge-სთან საუბარში განაცხადა, რომ ჟურნალსიტებმა პროტესტის უკიდურეს ფორმა აირჩიეს, რადგან სხვანაირად მათ არ უსმენენ.

"ჩვენ ჟურნალისტებს სხვა გზა არ გვაქვს, რადგან არ გვისმენენ ტელეეკრანიდან გამოვედით ქუჩაში აქციაზე. ჩვენ არ ვაპირებთ დანებებას, არ ვაპირებთ იბერიის გადაცემას", - განაცხადა ხუზმიაშვილმა.

მისი თქმით, ისინი იმყოფებოდნენ მთავრობის ადმინისტრაციასთან და პერმანენტული აქციები გაგრძელდება. ხუმზიაშვილმა განაცხადა, რომ ხვალ, 10 სექტემბერს ისინი პრეზიდენტს შეხვდებიან და ტელევიზიაში არსებულ პრობლემებზე ისაუბრებენ.

იბერიაში აცხადებენ, რომ ტელეკომპანია საფრთხის ქვეშა არის, რადგან ხელისუფლებამ მათ დაფინანსების მთავარი წყარო გადაუკეტა:

"კომპანია ომეგა ჯგუფი, რომლის შემადგენლობაში შედის ტელეკომპანია იბერია, პარალიზებულია. ხელისუფლებამ მიზანმიმართულად გააჩერა ფაბრიკა. ჩვენ, ჟურნალისტებს გვაქვს ინფორმაცია, რომ ეს ხდება საგანგებოდ, რომ აღარ ისმოდეს კრიტიკული აზრი."

ფინანსთა სამინისტროს განცხადებით, ომეგა ჯგუფში შემავალ სიგარეტის მწარმოებელ კომპანია შპს ოჯთ-ის საგადასახადო დავალიანების სახით ერიცხება 51 717 000 ლარი. სამინისტროს განმარტებით, დავალიანების ძირითად ნაწილს შეადგენს თამბაქოს ნაწარმზე აქციზის გადასახადის გადაუხდელობა. აღნიშნული დავალიანება დეკლარირებულია გადამხდელის მიერ 2015-2018 წლებში.

უწყების თქმით, ეს არის ერთადერთი კომპანია, რომელსაც 50 მილიონზე მეტი ვალი ერიცხება ბიუჯეტის წინაშე და თანხის გადაუხდელობის გამო კომპანიის მიმართ გავრცელებულია იძულებითი ღონისძიებები - ინკასო და ყადაღა.

ფინანსთა სამინისტროს განცხადებაში აღნიშნულია, რომ კომპანიამ დავალიანების გადანაწილებისთვის ორჯერ მიმართა, თუმცა გადახდის პირობების დარღვევის გამო, ორივე გრაფიკი გაუქმდა. მათივე თქმით, კომპანიამ 11-ჯერ მიმართა შემოსავლების სამსახურს, იძულებითი ღონისძიებების არ გამოყენების/გაუქმების თხოვნით, რომელიც მათ გაითვალისწინეს:

"იძულებითი ღონისძიებების გადავადების მიუხედავად, კომპანიამ საგადასახადო დავალიანების შემცირების ნაცვლად, განაგრძო დავალიანების ზრდა, რის გამოც შემოსავლების სამსახური იძულებული გახდა გამოეყენებინა მისთვის კანონით მინიჭებული ღონისძიებები".